Bilinkén xitay ziyaritidin ilgiri Uyghur irqiy qirghinchiliqning dawam qiliwatqanliqini éytti

Washin'gtondin muxbirimiz uyghar teyyarlidi
2024.04.23

Amérika tashqi ishlar ministiri antoniy bilinkén xitayni ziyaret qilishtin 2 kün burun tashqi ishlar ministirliqining “Herqaysi döletlerning 2023 yilliq kishilik hoquq doklati” ni élan qilip, xitayning Uyghur diyarida térrorizm, bölgünchilik we diniy radikalliqni tizginleshni bahane qilip Uyghur irqiy qirghinchiliqini dawamlashturuwatqanliqini éytqan.

Roytéris agéntliqi (Reuters) ning 2024-yili 4-ayning 23-künidiki xewirige asaslan'ghanda, amérika tashqi ishlar ishliri ministir antoniy bilinkén bu hepte xitay ziyaritini bashlashtin burun düshenbe küni élan qilin'ghan doklatta xitayning Uyghur diyarida Uyghur we bashqa musulman az sanliqlargha qaritilghan irqiy qirghinchiliqi we insaniyetke qarshi jinayitini dawamlashturuwatqanliqini bildürgen.

Bilinkén mundaq dégen: “Xitay xelq jumhuriyitide élip bériliwatqan éghir kishilik hoquq depsendichiliki ispatliri bilen otturigha qoyuldi. Mesilen, xitay xelq jumhuriyiti shinjangda musulman Uyghurlarni asas qilghan we bashqa étnik we diniy azsanliq millet ezalirigha qaritilghan irqiy qirghinchiliq, insaniyetke qarshi turush jinayiti, mejburiy emgek we bashqa kishilik hoquq depsendichiliklirini élip barmaqta”.

Düshenbe küni élan qilghan doklatta yene Uyghur diyarida bir milyondin artuq kishining lagér we türmilerde tutup turulushi we Uyghur diyaridiki qayta terbiyelesh lagérlirining ishlitilishi qatarliq tepsilatlar we xitayning keng Uyghurlargha qilin'ghan bashqa xorlashliri tepsiliy bayan qilin'ghan.

Bilinkén 2021-yili wezipige olturghanda, uningdin ilgiriki amérika hökümitining Uyghur irqiy qirghinchiliq toghrisidiki qararini qollighan we u xitay emeldarliri bilen körüshkende bu mesilini otturigha qoyghanidi.

Amérika tashqi ishlar ministirliqining bayanatigha asaslan'ghanda, amérika tashqi ishlar ministiri antoniy bilinkén 24-apréldin 26-aprélghiche xitayni ziyaret qilidiken. U shangxey we béyjingda xitayning yuqiri derijilik emeldarliri bilen körüshüp, ottura sherqtiki kirizis, rusiyening ukra'inagha qarshi urushi, teywen mesilisi we jenubiy déngiz qatarliq bir qatar rayon xaraktérlik we dunyawi mesililerni muzakire qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.