америка ташқи ишлар министири антони билинкен полинезийә арал дөлити тонгани зиярәт қилған күнлиридә хитайниң яман ғәрәзлик һәрикити һәққидә агаһландуруш бәргән.
америка дөләт мәҗлисиниң ахбарат тори болған "төпилик" (The Hill) торида берилгән хәвәрдә ейтилишичә, билинкен тонгада зиярәттә болуватқанда хитайниң дуняда мәсилә пәйда қилидиған қилмишлири һәққидә тохтилип: "биз көрүватқан бир иш шуки, хитайниң мәзкур райондики паалийәтлириниң көпийиши билән тәң мәсилә пәйда қилидиған қилмишлириму көпәймәктә" дегән. буниңға мисал сүпитидә хитайниң деңизчилиқ ишлиридики қанунсиз қилмишлири, башқа дөләтләрни талан-тараҗ қилиш шәклидики иқтисадий паалийәтлири һәмдә у дөләтләрниң һөкүмәтлирини чирикләштүридиған мәбләғ селиш һәрикәтлири қатарлиқларни көрсәткән.
буниңдин илгири антони билинкен хитайни зиярәт қилип, хитай рәиси ши җинпиң билән көрүшкән, америка билән хитай оттурисидики җиддийчиликни пәсәйтмәкчи болған болсиму, күткәндәк нәтиҗигә еришәлмигәниди.
антони билинкенниң бу қетимлиқ тонга зиярити хитайниң тинч окян арал дөләтлиригә күчәйтиватқан тәсирини тизгинләш һәмдә америка һөкүмитиниң бу район билән болған мунасивитини мустәһкәмләшни мәқсәт қилидикән. 7-айниң 26-күни, антони билинкен тонга баш министири совалени билән көрүшүп, хитайниң тонгани қанчилик қәрзгә боғуп қойғанлиқини сориған, совалени хитайниң қәрзини қайтурушқа башлиғанлиқини, бу җәһәттә һечқандақ мәсилә йоқлуқини билдүргән һәмдә буниңдин кейин америка билән килимат кризиси, маарип вә дөләт мудапиәси җәһәттә һәмкарлишидиғанлиқини билдүргән.