Amérika kéngesh palatasi gérmaniye aptomobili BMW ning Uyghur mejburiy emgikige chétishliq ikenlikini élan qildi

Amérika kéngesh palatasi 20-may küni tekshürüsh doklati élan qilip, dangliq gérmaniye aptomobili BMW ning xitaydiki mejburiy emgekke chétishliq ikenliki bayqalghanliqini élan qilghan. Doklatta yene jaguwar landi rowér (Jaguar Land Rover) we wolkiswagén (Volkswagen) aptomobilliriningmu amérika hökümiti teripidin Uyghur diyaridiki mejburiy emgekke chétishliq, dep cheklen'gen mal teminligüchi shirketlerdin zapchas sétiwalidighanliqini ilgiri sürgen. Melum bolushiche, kéngesh palatasining bir komitéti bir yildek tekshürüsh arqiliq bu aptomobil shirketlirining Uyghur mejburiy emgiki bilen baghlinishi barliqigha a'it bu xulasini chiqarghan.

Amérika kéngesh palatasi maliye komitétining re'isi ron waydén 2023-yili 3-ayda, aptomobil teminlesh zenjirining Uyghur diyaridiki mejburiy emgek bilen bolghan alaqisige da'ir tekshürüshini bashlighanidi. Mezkur komitétning 20-may élan qilghan doklatida, BMW ishlepchiqarghan we import qilghan aptomobillargha “Mejburiy emgekte ishlepchiqirilghan zapchaslarning ishlitilgenlikini qiyas qilish mumkinliki” bildürülgen. Doklatta qeyt qilinishiche, oxshash bir waqitta yene jaguwar landi rowérning zapchasliridimu bu xil mesile mewjut iken.

Doklatta yene oxshash ehwalning wolkiswagén ishlepchiqarghan aptomobillardimu mewjut ikenliki, uning amérika bazirida sétiwatqan aptomobillirigha bu xil zapchaslarning ishlitilgenliki, uning Uyghur diyari bilen bolghan “Ishlepchiqirish soda alaqisi izchil dawamlishiwatqanliqi” tekitlen'gen. Wolkiswagén yéqinqi yillardin béri uning ürümchidiki zawutini taqap, xitayning bu rayondiki “Irqiy qirghinchiliqi” gha shérik bolmasliq heqqidiki qattiq bésimgha uchrap kelgen bolsimu, biraq mezkur gérmaniye aptomobil shirkiti ürümchidiki zawutini taqashni izchil ret qilip kelgen. Nöwette, amérika kéngesh palatasi maliye komitétining bu doklati uning Uyghur diyari bilen bolghan sodisigha qandaq tesir qilidighanliqi melum emes. Wolkiswagén özining mejburiy emgekke chétilghanliqini ret qilip kelgen bolsimu, emma yéqinda uning turpandiki aptomobil meshiq meydani qurulushigha Uyghur mejburiy emgek küchlirini ishletkenliki ashkarilan'ghanidi.