Xitay da'iriliri bo shileyning parixorluq jinayiti bilen sotqa tartilidighanliqini jakarlidi

Xitay da'iriliri bügün chungching shehirining sabiq partkom sékrétari bo shileyni parixorluq, hoquqini süy'istimal qilish, chiriklik jinayetliri bilen eyibleydighanliqini jakarlidi. Emma sotning qachan bashlinidighanliqi heqqide éniq waqit bérilmidi.

Xewer élan qilin'ghandin kéyin, xitayning wéybo torida bu heqte nurghun mulahiziler élan qilin'ghan, emma qiziqarliqi, mulahizilerning hemmiside xitay hökümitining yuqiridiki qararigha medhiye oqulghan.

Birleshme agéntliqining bu heqtiki xewiride éytilishiche, adette bo shiley weqesidiki mezmunlar we bashqa sezgür mezmunlar qattiq süzüshtin ötküzülidighan wéybo torining weqe heqqidiki mulahiziler bilen toshup kétishi binormal ehwal hésablinidiken.

Uning üstige, mulahizilerning hemmisi bo shiley qattiq eyiblinidighan hemde xitay hökümitining qararini maxtaydighan mulahiziler bolushi, bularning xitay hökümiti pul bérip, mexsus wéybo munazire tor bétide özi üchün gep qilghili salidighan saxta munazirichiler ikenlikini éniq körsitip béridiken.

Melum bolushiche, bo shileyge bu qétim békitilgen jinayet sani deslep tilgha élin'ghan jinayettin azlap ketken hem shundaqla uning parixorluq qilghanliqi ilgiri sürülüwatqan pulning miqdarimu azlap ketken.

Siyasiy mulahizichilerning qarishiche, bo shiley weqesi xitay kompartiyisi yuqiri qatlimidiki ichki ziddiyet we küreshler bilen chétishliq bolup, xitay hökümiti xelq'aragha ashkarilinip ketken bu weqeni qandaq bir terep qilishta qattiq sinaqqa duch kelmekte iken.