Bostondiki partlash weqesi üstidiki tekshürüsh dawam qilmaqta

Bügün amérika prézidénti barak obama boston shehirige yétip kélip15-aprél küni yüz bergen partlash weqeside hayatidin ayrilghanlar üchün ötküzülgen matem murasimigha qatnashti.

U amérika saqchi organlirining bu térror weqesini peyda qilghan jawabkarni tépip chiqip, tégishlik jazagha tartish niyitining qet'iy ikenlikini tekitlidi.

Amérikida bostondiki partlitish weqesige chétishliq jinayet gumandarlirini izdesh xizmiti jiddiy dawam qilmaqta. Hazir da'iriler shu jaydiki orunlarning kamérasigha chüshüp qalghan körünüshlerni tetqiq qilish arqiliq jinayetchining kimlikini belgilep chiqishqa tirishmaqta.

S n n téléwiziyisi bügünki xewiride, ikki kishining qolida xalta kötürüp kélip neq meydan'gha tashlap qoyup ayrilghanliqidek bir körünüshning shu jaydiki bir kiyim dukinining kamérasigha chüshüp qalghanliqini, tekshürgüchilerning hazir bu ikki kishini izdewatqanliqini bildürdi.

Bostondiki xelq'ara maratonche yügürüsh musabiqisining axirlishish nuqtisida arqa-arqilap yüz bergen ikki partlashta hazirghiche 3 kishi hayatidin ayrildi. 178 Kishi yarilandi.