Уйғур елидики чағанлиқ етибар сиясәтлири немини көзләйду?

Хитай башқурушидики “тәңритағ тори” ниң 28-январдики хәвиригә қариғанда, хитай һөкүмити уқтуруш чиқирип, 2025-йиллиқ чаған байрими мәзгилидә үрүмчи шәһридә сәккиз түрлүк етибар тәдбири йолға қоюлидиғанлиқини җакарлиған.

Уқтурушта ейтилишичә, бу тәдбирләр ичидә һәрқайси җайлардики машина тохтитиш мәйданлирида һәқ алмаслиқ, кутупхана вә музейларни һәқсиз ечиветиш, һөкүмәт мулазимитини тохтатмаслиқ, етилдақ (поҗаңза) сетиш нуқтилирини көпәйтиш вә етилдақ баһасини төвәнлитиш, аммиви такси машинилирини көпәйтиш, қатнаш қаидисигә тунҗи қетим хилаплиқ қилғучиларға йәңгил җаза бериш қатарлиқлар орун алған.

Бу йилму алдинқи йиллардикигә охшаш чаған һарписида уйғур елидики һәрқайси җайларда чағанлиқ байрамни тәбрикләш үчүн түгрә түгүш, панус ясаш вә ишикләргә хитайчә мәснәви есиш зор дағдуға билән давам қиливатқанда, бундақ бир йүрүш “етибар сиясити” ниң оттуриға чиқиши, мәзкур байрамни улуғлаштуруш билән бағланған һалда муназирә қилиниватқанлиқи мәлум.

Уйғур елидики қирғинчилиқта уйғурларниң мәниви мәдәнийәт дуняси әң еғир зәрбигә учриған саһәләрниң бири болуп, нөвәттә хитай һөкүмитиниң зор күч билән хитайларниң чаған байримини уйғурларниң “қурбан һейт”, “роза һейт” дегәндәк әнәниви байрамлириниң орниға дәсситишкә урунуватқанлиқи мәлум болмақта. Шу сәвәбтинму бу хилдики “етибар сиясәтлири” ниң чаған байрими мәзгилидә йолға қоюлуши, уйғур җәмийитигә чаған байрими һәққидә иҗабий тәсир қалдуруш һәмдә шу арқилиқ уйғур җәмийитиниң чаған байримини өзлири халиған һалда байрам сүпитидә қобул қилишиға хизмәт қилдуруш урунуши, дәп қаралмақта.