Uyghur élidiki chaghanliq étibar siyasetliri némini közleydu?

Xitay bashqurushidiki “Tengritagh tori” ning 28-yanwardiki xewirige qarighanda, xitay hökümiti uqturush chiqirip, 2025-yilliq chaghan bayrimi mezgilide ürümchi shehride sekkiz türlük étibar tedbiri yolgha qoyulidighanliqini jakarlighan.

Uqturushta éytilishiche, bu tedbirler ichide herqaysi jaylardiki mashina toxtitish meydanlirida heq almasliq, kutupxana we muzéylarni heqsiz échiwétish, hökümet mulazimitini toxtatmasliq, étildaq (pojangza) sétish nuqtilirini köpeytish we étildaq bahasini töwenlitish, ammiwi taksi mashinilirini köpeytish, qatnash qa'idisige tunji qétim xilapliq qilghuchilargha yenggil jaza bérish qatarliqlar orun alghan.

Bu yilmu aldinqi yillardikige oxshash chaghan harpisida Uyghur élidiki herqaysi jaylarda chaghanliq bayramni tebriklesh üchün tügre tügüsh, panus yasash we ishiklerge xitayche mesnewi ésish zor daghdugha bilen dawam qiliwatqanda, bundaq bir yürüsh “Étibar siyasiti” ning otturigha chiqishi, mezkur bayramni ulughlashturush bilen baghlan'ghan halda munazire qiliniwatqanliqi melum.

Uyghur élidiki qirghinchiliqta Uyghurlarning meniwi medeniyet dunyasi eng éghir zerbige uchrighan sahelerning biri bolup, nöwette xitay hökümitining zor küch bilen xitaylarning chaghan bayrimini Uyghurlarning “Qurban héyt”, “Roza héyt” dégendek en'eniwi bayramlirining ornigha dessitishke urunuwatqanliqi melum bolmaqta. Shu sewebtinmu bu xildiki “Étibar siyasetliri” ning chaghan bayrimi mezgilide yolgha qoyulushi, Uyghur jem'iyitige chaghan bayrimi heqqide ijabiy tesir qaldurush hemde shu arqiliq Uyghur jem'iyitining chaghan bayrimini özliri xalighan halda bayram süpitide qobul qilishigha xizmet qildurush urunushi, dep qaralmaqta.