xitayning chaghan bayrimi «jungxu'a milliti ortaq éngi gewdisi» berpa qilishning wasitisige aylinip, mejburiy omumlashturuluwatqan uyghur élide, da'iriler bu yilmu xitaylarning mezkur milliy bayrimini rayondiki uyghurlarni asas qilghan musulman türkiy milletler birlikte daghdughiliq kütüwélishning teyyarliqini bashlighan.
xitay hökümet taratqulirining qeyt qilishiche, uyghur aptonom rayonluq partkom bu yil 28-yanwardin 4-féwralghiche tebriklinidighan 2025-yilliq chaghan bayrimi mezgilide her millet ammisi «jungxu'a millitining ésil medeniyet eneniliri» ni namayan qilishni, rayongha téximu köp sayahetchi jelp qilip, istémalni janlandurushni otturigha qoyghan. uyghur élidiki bu yilliq chaghanni kütüwélish pa'aliyetliride uyghurlarning tarixi we qedimiy medeniyet böshüki bolghan qeshqer shehiri nishanliq merkiziy nuqtilarning biri bolghan. «qeshqer géziti» ning 3-yanwar bergen bu heqtiki xewiride, qeshqerde 2025-yilliq chaghanni kütüwélish pa'aliyitining resmiy bashlanghanliqi, bashlinish murasimining 31-dékabir küni qeshqer shehiri qedimiy restidiki «wenda meydani» da daghdughiliq ötküzülüp, xitayning eneniwi shir oyunlirining körsitilgenlikini bildürgen.
xitay hökümitining 2017-yili bashlanghan chong tutquni bilen bir waqitta, uyghurlarning qurban héyt, roza héyt, noruzgha oxshash eneniwi milliy hem diniy bayramlirini ötküzüshi cheklimige uchrighanliqi melum. halbuki, uyghur a'ililirining chaghan bayrimi ötküzüshi, ishik-dérizilirige xitayche mesnewi chaplap, panus ésishi, chaghanning harpisida tügür tügüp yéyishi, ularning siyasiy sadaqitini sinashning ölchimige aylanghan.
«xitay géziti» ning xewer qilishiche, uyghur aptonom rayonluq medeniyet-sayahet nazariti bu yilliq yéngi yil we chaghangha atap uyghur éli miqyasida 727 meydan nahiye-sheherdin yuqiri derijilik medeniyet-sayahet pa'aliyiti uyushturghan, shundaqla yéza-qishlaq ahalilirini «panus seylisi», «changchile oyunliri» ni öz ichige alghan «jungxu'a millitining ésil medeniyet enenliri» ni namayan qilishqa orunlashturghan. xitay hökümiti bu pa'aliyetlerning milletler ittipaqliqini algha sürüshni meqset qilghanliqini qeyt qilsimu, lékin bu béyjingning uyghurlarni mejburiy assimilyatsiye qilish pilanining bir parchisi, dep qaralmaqta. xitayning bu yilliq chaghan bayrimi uning iqtisadi kasatliship, istémal baziri palech halgha chüshüp qalghan peytte yétip kelgen. «qeshqer géziti» ning bildürüshiche, da'iriler chaghanni her xil shekil we mezmunda kütüwélish arqiliq, istémal bazirini janlandurushnimu meqset qilmaqta iken.