Xitay chaqiliq bilen lopnur baziri arisigha tömüryol yatquzush mumkinchilikini muzakire qilghan

Uyghur aptonom rayonluq tereqqiyat-islahat komitéti yighin chaqirip, chaqiliq nahiyesi bilen lopnur köli etrapigha jaylashqan lopnur baziri arisida tömüryol yatquzush qurulushining mumkinlikichilikini muzakire qilghan. Xitay taratqulirining xewerliridin melum bolushiche, eger bu tömüryol qurulushi pütüp resmiy ishqa kirishse, chaqiliq nahiyesi bilen qomul shehiri tömüryol arqiliq resmiy baghlinidiken. “Shinjang géziti” ning 1-may küni bergen xewiride, chaqiliq-lopnur baziri tömüryoli xitayning dölet we aptonom rayon békitken 2023-yildiki nuqtiliq qurulush türlirining biri ikenlikini bildürgen.

Xewerde éytilishiche, lopnur-chaqiliq tömüryolining omumiy musapisi 299.8 Kilométir bolup, uning lopnur baziridin miren'giche bolghan musapisi 238.9 Kilométir, mirendin chaqiliqqiche bolghan musapisi 60.9 Kilométir kélidiken. Ilgiri xitayning qumul bilen lopnur bazirini tömüryol arqiliq tutashturushi, shundaqla uning emdi bu tömüryolni lopnur baziridin chaqiliqqa tutashturushni pilanlishi, közetküchilerning diqqitini qozghighan. Xitayning tarim deryasining töwen éqimidiki lopnur wadisidin ibaret bu bipayan chöllük rayonigha tömüryol yatquzushi so'al peyda qilmaqtiken.

Chet el tetqiqat orunlirining doklatliri we xitay taratqulirining xewerliridin ashkarlinishiche, kaliy tuzi, litéy qatarliq aptomobil we yanfon mehsulatlirining zapchaslirini ishlepchiqirishta ishlitidighan qimmetlik maddilarni ishlepchiqirish bazilirining lopnur etrapigha jaylashqanliqi melum. “Shinjang géziti” ning qeyt qilishiche, lopnur-chaqiliq tömür yoli, xitayning “Bir belbagh bir yol” qurulushi, gherbni échish istiratégiyesi we yipek yoli iqtisadiy belbéghi qurulushining muhim qatnash ul eslihesi iken. Xitay buning aldida chaqiliq bilen korlani, we chaqiliq bilen chingxey ölkisining golmud shehirini tömüryol arqiliq tutashturghan idi.