Чеграсиз мухбирлар тәшкилати хитайни илһам вәли қатарлиқ мухбирларни қоюп беришкә чақирди

Мухбиримиз әркин
2018-09-28
Елхәт
Пикир
Share
Принт

Чеграсиз мухбирлар тәшкилати җүмә күни баянат елан қилип, хитай даирилирини илһам вәли, мәмтимин обул, җүрәт һаҗи, миркамил аблимит қатарлиқ «шинҗаң гезити» вә «шинҗаң деһқанлар гезити» ниң баш вә мәсул муһәррирлирини вә бөлүм башлиқлирини қоюп беришкә чақирған. Мәзкур тәшкилатниң илгири сүрүшичә, уларниң қолға елиниш сәвәби күлкилик икән.

Хитай даирилири бу йил 8‏-айда «шинҗаң гезити» ниң муавин баш муһәррири илһам вәли, бөлүм башлиқлири мәмтимин обул, җүрәт һаҗи вә «шинҗаң деһқанлар гезити» ниң баш муһәррири миркамил аблимитни «икки йүзлимичилик» билән әйибләп қолға алған.

Чеграсиз мухбирлар тәшкилатиниң илгири сүрүшичә, хитай даирилири «икки йүзлимичи» дегән бу мүҗмәл аталғуни қоллинип, хитай һөкүмитиниң сияситигә йошурун наразилиқ билдүргән шәхсләрни җазалимақта икән.

Баянатта, чеграсиз мухбирлар тәшкилати шәрқий асия бөлүминиң мәсули сидрик әләиани «икки йүзлимичилик дегән бу җинайәтниң кәшип қилиниши, пәқәт хитай даирилириниң бу журналистларни тутқун қилишта қолға чиққудәк бир сәвәб йоқлуқини намаян қилиду» дегән.

Баянатта тәкитлинишичә, хитайниң бу райондики мусулман түркий хәлқләргә қарита елип барған кәң көләмлик системилиқ бастуруши һәрикити нурғун уйғур журналистлири вә уларниң аилә тавабиатлириниң техиму көпләп халиғанчә тутқун қилинишиға йол ачқан.

Чеграсиз мухбирлар тәшкилати йеқинда елан қилған «2018‏-йиллиқ дуня ахбарат әркинлик көрсәткүчи» дә хитайни 180 дөләт ичидә ахбарат әркинлики әң начар дөләтләрниң бири, дәп елан қилип, 176‏-орунға тизған иди.

Пикирләр (0)
Share
Толуқ бәт