Чен чуәнгониң уйғур елида "милләтләр мәсилисини җуңгочә услубта һәл қилишни давамлаштуруш" нутқи диққәт қозғиди

Мухбиримиз ирадә
2019-04-04
Share

"хитай хәвәрләр тори" ниң хәвәр қилишичә, 2-апрел сәйшәнбә күни үрүмчидә уйғур аптоном районлуқ парткомниң секретари чен чуәнгониң биваситә риясәтчиликидә "милләтләр иттипақлиқини илгири сүрүш сөһбәт йиғини" ечилған.

Мәзкур йиғинда чен чуәнго милләтләр иттипақлиқини күчәйтип, уйғур елида узун муддәтлик әминликни бәрпа қилишни тәкитлигән. У сөзидә "буниң үчүн алди билән райондики милләтләр мунасивитини яхши игиләшни, милләтләр мәсилисини җуңгочә услубта һәл қилиштин ибарәт тоғра йолда қәтий меңишни, партийәниң милләтләр сияситини әмәлийләштүрүшни" тәкитлигән.

Хитай һөкүмити йеқинқи 3 йилдин буян уйғур елида 2 милйондин ошуқ уйғур вә қазақ қатарлиқ йәрлик милләтләрни лагерға қамиғандин сирт районни еғир дәриҗидә қамал астиға алғанлиқи мәлум. Хитай һөкүмити хәлқараниң бу һәқтики тәнқидлиригә қайтурған җавабида өзлириниң дуняға омумйүзлүк тәһдит селиватқан террорлуқ вә радикаллиқни хитайға хас услуб билән йоқитиватқанлиқини илгири сүргән вә һәтта дуня дөләтлирини хитайдин үлгә елишқа дәвәт қилған иди.

Чәтәлләрдики уйғур көзәткүчиләр чен чуәнгониң "милләтләр мәсилисини җуңгочә услубта һәл қилишни давамлаштуруш" сөзини тилға елиши әмәлийәттә райондики лагер түзүми вә қаттиқ қоллуқ сиясәтләрниң изчил давам қилидиғанлиқидин бешарәт беридиғанлиқини тәкитлимәктә.

Юқириқи хәвәрдин қариғанда, чен чуәнго сөзидә йәнә "аз санлиқ милләтләрниң өрп-адәтлиригә һөрмәт қилиш вә қоғдаш, уларниң дөләт башқурушқа қатнишиш һоқуқлириға капаләтлик қилиш, өз миллий тил-йезиқини ишлитишигә капаләтлик қилиш, миллий айримичилиқ вә уларниң һес-туйғулирини зедиләйдиған иш-һәрикәтләргә қәтий қарши туруш" ни тәкитләп өткән.

Көзәткүчиләрниң қаришичә, униң районда иҗра қилиниватқан әшәддий сиясәтлиригә пүтүнләй зит келидиған бу сөзлири хәлқарада йеқиндин буян күчийиватқан тәнқидләргә қарши хәлқара җәмийәтниң көзини бояш үчүн қилинған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт