Uyghur aptonom rayonining partkom sékrétari chén chüen'go chet'ellerdiki bölgünchilergimu zerbe béridighanliqini bildürgen.
Xitayning xelq géziti tarqatqan xewerge qarighanda, chén chüen'go xelq gézitige qilghan sözide, özining "Bölgünchilik we térrorluqqa qarshi" küreshni qet'iy dawamlashturidighanliqini we buning üchün chégraning ichi-sirtidiki, "Shinjangning ichi we sirtidiki shundaqla intérnét toridiki barliq bölgünchilik heriketlirige qattiq zerbe béridighanliqi" ni eskertken.
Uyghur rayon da'iriliri 11-féwral düshenbe küni yene mexsus "Chet'ellerde oquwatqan oqughuchilar xizmiti" yighinini chaqirghan bolup, yighinda chet'ellerde oquwatqan oqughuchilargha qaritilghan bashqurush we idiyewi terbiye xizmitini kücheytish mesilisi alahide muzakire qilin'ghan.
Chet'ellerdiki Uyghur pa'aliyetchilerning eskertishiche, xitay hökümiti Uyghur élini qattiq qamal astigha alghan bilen teng emdiki nishanini chet'ellerdiki Uyghur jama'itige we ularning türlük milliy we siyasiy pa'aliyetlirige zerbe bérishni kücheytishkimu qaratmaqtiken.
Xitay da'iriliri otken yili misir da'iriliri bilen birliship, misirda oquwatqan Uyghur oqughuchilarni éghir teqib we tutqun'gha uchratqan idi.
