Чен чүәнго үрүмчидә африқа дөләтлириниң баш әлчилири билән көрүшти

Мухбиримиз әзиз
2021-05-31
Share

Уйғур дияридики ирқий қирғинчилиқ мәсилиси дуняниң диққитини қозғаватқанда уйғур аптоном районлуқ парткомниң секретари чен чүәнго үрүмчидә бир қисим африқа дөләтлириниң хитайда турушлуқ баш әлчилири билән ‍учришип, хитай һөкүмитиниң уйғурлар сияситини ақлиди.

"шинҗаң гезити" ниң 31-майдики хәвиридә ейтилишичә, буниңдин икки күн илгири чен чүәнго вә шөһрәт закир үрүмчигә зиярәткә кәлгән бир қисим африқа дөләтлириниң дипломатлири билән сөһбәттә болған. Сөһбәттә чен чүәнго өткән бирнәччә йилда уйғур диярида иҗтимаий муқимлиқ вә иқтисадий тәрәққиятта бәкму зор нәтиҗиләрниң барлиққа кәлгәнлики, бу җайдики кишиләргә берилгән йүзлигән һоқуқларниң, җүмлидин диний етиқад һоқуқи вә мәдәнийәт һоқуқиниң бәкму яхши қоғдиливатқанлиқи, әмма ғәрп дунясидики бир қисим һәсәтхор "дүшмән күчләр" ниң ақ-қарини ‍астин-үстүн қилип, компартийәгә бәднам чаплаватқанлиқи һәққидә вәз ейтқан. Зиярәткә кәлгән африқа дипломатлириму өзлириниң хитай һөкүмитини қәти һемайә қилидиғанлиқини вә бу җайдики "бәхтияр" мәнзирини көргәнликини ейтқан.

Анализчилар бу һәқтә пикир қилип: "бу алиқачан хитай һөкүмитиниң ‹қәрз дипломатийә' сигә боғулуп болған африқа дөләтлириниң ‹еғиз йесә йүз уюлар' дегәндәк иш қилишидур. Хитай һөкүмити алиқачан уйғурларниң диний етиқадини вә тил-йезиқини мәний қилип болди. Улар мушу шәкилдә көп қетим чәт әл өмәклирини алдимақчи болған. Әмма улар пәқәт өзини-өзи алдаштин башқиға яримайду," дейишмәктә. Шуниңдәк хитай һөкүмитиниң һазирғичә бирму мустәқил чәт әл тәкшүрүш гурупписиға иҗазәт бәрмигәнликини буниңға мисал қилип көрситишмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт