Chén chüen'go ürümchide afriqa döletlirining bash elchiliri bilen körüshti

Uyghur diyaridiki irqiy qirghinchiliq mesilisi dunyaning diqqitini qozghawatqanda Uyghur aptonom rayonluq partkomning sékrétari chén chüen'go ürümchide bir qisim afriqa döletlirining xitayda turushluq bash elchiliri bilen ‍uchriship, xitay hökümitining Uyghurlar siyasitini aqlidi.

“Shinjang géziti” ning 31-maydiki xewiride éytilishiche, buningdin ikki kün ilgiri chén chüen'go we shöhret zakir ürümchige ziyaretke kelgen bir qisim afriqa döletlirining diplomatliri bilen söhbette bolghan. Söhbette chén chüen'go ötken birnechche yilda Uyghur diyarida ijtima'iy muqimliq we iqtisadiy tereqqiyatta bekmu zor netijilerning barliqqa kelgenliki, bu jaydiki kishilerge bérilgen yüzligen hoquqlarning, jümlidin diniy étiqad hoquqi we medeniyet hoquqining bekmu yaxshi qoghdiliwatqanliqi, emma gherp dunyasidiki bir qisim hesetxor “Düshmen küchler” ning aq-qarini ‍astin-üstün qilip, kompartiyege bednam chaplawatqanliqi heqqide wez éytqan. Ziyaretke kelgen afriqa diplomatlirimu özlirining xitay hökümitini qet'i hémaye qilidighanliqini we bu jaydiki “Bextiyar” menzirini körgenlikini éytqan.

Analizchilar bu heqte pikir qilip: “Bu aliqachan xitay hökümitining ‛qerz diplomatiye‚ sige boghulup bolghan afriqa döletlirining ‛éghiz yése yüz uyular‚ dégendek ish qilishidur. Xitay hökümiti aliqachan Uyghurlarning diniy étiqadini we til-yéziqini men'iy qilip boldi. Ular mushu shekilde köp qétim chet el ömeklirini aldimaqchi bolghan. Emma ular peqet özini-özi aldashtin bashqigha yarimaydu,” déyishmekte. Shuningdek xitay hökümitining hazirghiche birmu musteqil chet el tekshürüsh guruppisigha ijazet bermigenlikini buninggha misal qilip körsitishmekte.