Чен чүәнго қәшқәрни зиярәт қилғанда "милләтләрниң туғқанчилиқи" ни техиму чоңқурлаштурушни тәләп қилған

Мухбиримиз әркин
2021-07-16
Share

Уйғур аптоном районлиқ парткомниң секритари чен чүәнго 14-вә 15-июл күнлири қәшқәрни зиярәт қилип, "милләтләрниң туғқанчилиқи" техиму чоңқурлаштурушни, "җоңхуа миллити ортақгәвдиси" идийәсини техму мустәһкәмләшни тәләп қилған.

У йәнә ши җинпиңниң 1-июлдики нутуқини әстайидил өгинип, "шинҗаңниң муқимлиқ вә тәрәққият хизмитиниң әмәлий һәркитигә айландуруш" ни тәләп қилған. Ши җинпиң 1-июл күни хитай компартийәсиниң 100 йиллиқини тәбриләш паалийитидә нутуқ сөзләп, ғәрбкә тәһдит салған. У хитайниң "муқәддәс вәзханлиқ" қа яки чәт әл күчлириниң бозәк қилишиға йол қоймайдиғанлиқини тәкитлигән иди.

Чен чүәнгониң зиярити америка кеңәш палатасиниң "уйғур мәҗбурий әмгикиниң алдини елиш қанун лайиһәси" ни мақуллиған күнигә тоғра кәлгән. Чен чүәнго қәшқәрдә хәқлара кишилик һоқуқ тәшкилатлири тәрипидин "мәҗбурий әмгәк карханилири" дәп қариливатқан кийим-кечәк, көктатчилиқ, навайчилиқ бағчилирини көздин кәчүргән. Шундақла "балилар лагерлири" дәп қарилип кәлгән барен йезисниң юқуриқи барен кәнтидики бир йәслини зиярәт қилған.

Бу хил "ятақлиқ мәктәпләр", кишилик һоқуқ тәшкилатлири тәрипидин хитайниң уйғур балилирини ата-анисидин айрип, аилиси, тил вә мәдинийити билән болған алақисини үзүп ташлашни мәқсәд қилған "ирқий қирғинчилиқ" һәркитиниң бир қисми, дәп әйиблинип кәлгән.

"шинҗаң гезити" ниң хәвәр қилишичә, чен чүәнго йәнә "шинҗаңни ичкири ‍өлкиләргә техиму кәң ечиветиш" ни тәкитләп, "милләтләр иттипақлиқини алға сүрүшни техиму чоқурлаштуруш, милләтләр иттипақ бир аилә туғқанчилиқи вә милләтләр иттипақлиқи бирләшмә достлиқ паалиәтлирини техиму кеңәйтиш керәк," дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт