Chén chu'en'go ötken besh yilda "Shinjangda 'jongxu'a milliti ortaq éngi' tiklen'genliki we 'islamning xitaychilashturulghanliqi'" ni bildürgen

Muxbirimiz erkin
2021-10-22
Share

Uyghur aptonom rayonluq partkomning sékritari chén chu'en'go 21-öktebir küni aptonom rayonluq partkomning 10-qétimliq wekiller qurultiyida söz qilip, xitayning Uyghur élidiki yéqinqi besh yilliq siyasetliri we xizmetlirini xulasilighan.

U sözide xitayning yéqinqi 5 yildin béri Uyghur élida ijra qilip kelgen, biraq bezi gherb hökümetliri we parlaméntliri teripidin "Irqiy qirghinchiliq" dep qaralghan atalmish "Shinjangni bashqurush istiratégiyesi" ni mu'eyyenleshtügen. U bu mezgil ichide shinjangdiki milletlerde "Jongxu'a milliti ortaq éngi" turghuzulghanliqi, rayonda "Islamning xitaychilashturulushi" ishqa ashurulghanliqini bildürgen.

Chén chu'en'goning tekitlishiche, yoquriqi tedbirler arqiliq shinjangda uzun muddetlik eminlikning asasi téximu puxta sélin'ghan. Chén chu'en'go: "Bu besh yil mabeynide tengritéghining jenubiy we shimalida ghayet zor özgirish boldi. Bu partiyening yéngi dewrdiki shinjangni bashqurush istratégiyesining intayin dana we toghra ikenlikini toluq ispatlidi," dégen. Uning éyti'ishiche, xitay kompartiyesining bu siyasiti "Shinjangning emeliyitige pütünley muwapiq" iken. Biraq chén chu'en'go buning qandaq bedellerge kelgenliki, Uyghurlarni asas qilghan yerlik milletlerning qandaq ziyanlarni tartqanliqini tilgha ‍almighan.

Chén chu'en'goning éytishiche, "Ular shinjang xizmitini yaxshi ishlesh, ijtima'iy muqimliq we uzun muddetlik eminlikni algha sürüsh üchün, choqum partiyening yéngi dewrdiki shinjangni bashqurush istratégiyesini tewrenmey emeliyleshtürüsh kéreklikini chongqur hés qilghan."

Chén chu'en'go bu sözlerni amérika bashchiliqidiki bezi gherb hökümetliri we parlaméntliri xitayning Uyghurlargha yürgüzgen yéqinqi 5 yil jeryanidiki siyasitini "Irqiy qirghinchiliq" dep étirap qilghan hem xitayni jawabkarliqqa tartishini telep qiliwatqan bir waqitta qilghan. Chén chu'en'go bu sözlerni qilghan shu küni dunyadiki 43 dölet ortaq bayanat élan qilip, Uyghurlarning weziyitidin endishe qiliwatqanliqini bildürgen. Ortaq bayanatta xitayni musteqil tekshürgüchilerning Uyghur élida tekshürüsh élip bérishigha yol qoyushqa chaqirghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet