Чен чүәнго қатарлиқлар аталмиш “үч хил күч‏” кә техиму қаттиқ зәрбә беришни тәләп қилди

Мухбиримиз үмидвар
2018-02-11
Share

Уйғур аптоном райони коммунистик партийә секретари чен чүәнго башчилиқидики хитай компартийә комитети даирилириниң уйғур диярида “муқимлиқ һәммини бесип чүшиду‏”, “үч хил күч‏” вә “икки йүзлимичи‏” ләргә “қаттиқ зәрбә бериш‏” дегәндәк сиясий лозункилири астидики омумйүзлүк тәқибләш сияситиниң уйғур аптоном районини үсти очуқ түрмигә айландурувәткәнлики хәлқара мәтбуатлардин кәң орун еливатқан һәм хәлқаралиқ һоқуқ тәшкилатлириниң тәнқидигә учраватқанда, 9-феврал күни уйғур аптоном районлуқ партком сиясий қанун хизмәт йиғини ачқан. Партком секретари чен чүәнго тәстиқ вә көрсәтмә бәргән, уйғур дияриниң сиясий муқимлиқиға биваситә мәсул сиясий қанун комитет секретари җу хәйлун, қазақ миллитидин болған муавин секретар қатарлиқлар сөз қилған мәзкур йиғинда өткән бир йиллиқ зәрбә бериш ишлири хуласилинип, бу йил “үч хил күчләр‏” гә қаттиқ зәрбә беришни техиму күчәйтиш тәләп қилинған.

“шинҗаң гезити‏” ниң хәвиридин ашкарилинишичә, йиғин хуласиси сүпитидә бу йил “юқири бесим көрситиш‏”, “еғир зәрбә бериш‏”, “тармар қилиш характерлик зәрбә бериш‏”, “йоқитиш характерлик зәрбә бериш‏”, “үч хил күчләргә һәргизму дәм еливелиш пурсити бәрмәслик‏”, “баш көтүргән һаман зәрбә бериш‏” дегәндәк бир йүрүш зәрбә бериш шоарлири тәкитләнгән. 

Техи йеқиндила хитай компартийиси тәрипидин уйғур аптоном райониға қайта рәисликкә тәйинләнгән шөһрәт закирму өзиниң һөкүмәт хизмәт нутқида кәлгүси бәш йилда “үч хил күчләр‏” гә қарши техиму қаттиқ күрәш қилидиғанлиқини җакарлиған иди.

Уйғур көзәткүчилири хитай сиясий қанун даирилириниң йиғини аталмиш “йепиқ тәрбийиләш мәркәзлири‏” вә башқа тәқибләшлириниң буниңдин кейин техиму күчийишидин дерәк беридиғанлиқини пәрәз қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт