Chén chu'en'go jem'iyet muqimliqi tedbirlirini yene kücheytishni tekitligen

Muxbirimiz jüme
2017-08-19
Share

Uyghur élide mukemmel bir saqchi döliti berpa qiliniwatqanliqi ilgiri sürülüwatqan bir mezgilde, Uyghur aptonom rayonining partkom sékrétari chén chu'en'go rayonda yolgha qoyulghan jem'iyet muqimliqi tedbirlirini yene kücheytish heqqide yolyoruq bergen.

Xitay kompartiyisining xewerler torida körsitishiche, u, 18-awghust bergen körsetmiside mezkur kücheytilgen muqimliq tedbirlirining "19-Nöwetlik partiye qurultiyining ghelibisi" we "Shi jinping yadroluqidiki partiye merkiziy komitétini xatirjem qilish" üchün élinidighanliqini bildürgen.

U yene ilgirimu tekitlep kelgen "Bir meydan xelq urushushi qilish", "Aldin qol sélish" qatarliq ibarilerni yene ishletken bolsimu, emma Uyghur élide muqimliq tedbirlirining yene kücheytilidighanliqi heqqide shepe bergen.

Xewerge qarighanda, uning atalmish yolyoruqida pütün rayondiki "Partiye, hökümet, herbiy, saqchi we xelq zich ittipaqliship, térrorluqqa qarshi turup jem'iyet muqimliqini saqlaydighan polat istihkam qurup chiqishqa" chaqirilghan.

U mundaq dégen: "Tiz ghelibe qilish idiyisini yéngip, heqqaniyettin qaytmay, qattiq zerbe bérish urushini menggü dawam qilish, toluq ghelibe qazanmay turup, esker chékindürmeslik kérek."

Uyghur élidiki atalmish muqimliq tedbirlirining misli körülmigen derijide kücheytilgenliki xewer qiliniwatqan mezgilde chén chu'en'go yuqirida bergen yol yoruqning yene némidin dérek béridighanliqi hazirche namelum.

Halbuki, bu "Yolyoruq" chén chu'en'go Uyghur rayonigha bashliq qilip yötkelgen 11 ay ichide 80 mingdin artuq saqchi yaki bixeterlikke a'it xizmetke élan chiqirilghanliqi, nahiye-nahiyelerde yépiq terbiyilesh merkezliri qurulup atalmish gumanliq Uyghurlarning qamalghanliqi, yol éghizlirida tekshürüsh ponkitliri we saqchi botkiliri tesis qilinip, Uyghurlarning qattiq teqib astigha élin'ghanliqi xewer qilin'ghan mezgilge toghra keldi.

Bu heqte toxtalghan gérmaniyediki yawropa medeniyet we ilahiyetshunasliq uniwérsitéti tetqiqatchisi adriyan zénz: "Bu, öz nöwitide yene bir saqchi döliti berpa qilishning shertlirini hazirlash bilen biwasite munasiwetlik" dégen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.