Chén chüen'go Uyghur élidiki yuqiri bésimliq siyasetlerni izchil dawamlashturushni telep qildi

Muxbirimiz irade
2020-11-26
Share

Uyghur aptonom rayonluq partkomning sékritari chén chüen'goning Uyghur élida "Sotsiyalistik shinjangning yéngi dewrini berpa qilish" ni tekitlishi diqqet qozghidi.

"Tengritagh" torining xewirige qarighanda, Uyghur aptonom rayonining chén chüen'go, shöhret zakir, wang jünjing qatarliq rehberliri 24-we 25-noyabir künliri aptonom rayonluq partiye komitéti nezeriye tetqiqat merkizi guruppisi bilen birlikte yighin uyushturup, xitay kompartiyesi siyasiy byurosining üchinchi nöwetlik "Shinjang xizmiti yighini" ni öginish, shi jinpingning sözining rohini tetqiq qilip, uni qet'iy emeliyleshtürüsh, "Shinjangni bashqurush istratégiyesi" omumiy nishanini mustehkem saqlash, yéngi dewrde "Shinjang xizmiti" de yéngi weziyet yaritish dégenlerni tekitligen.

Yighinda tekitlen'gen noqtilar xitay hökümitining Uyghur élida ijra qilip kéliwatqan yuqiri bésimliq siyasetlirini yenimu kücheytidighanliqidin dérek béridiken.

Chén chüen'go yighindiki sözide mundaq dégen: "Shinjangda uzun muddetlik eminlik qurulushida ching turup, 'jungxu'a milliti' éngini shekillendürüshke ehmiyet bérish, jungxu'a milliti éngi we tarixini shinjangning kadirlar ma'aripi, yashlar ma'aripi we ijtima'iy ma'aripqa singdürüsh kérek. . . 'bir gewde bolush', 'milletler ittipaqliq we dostluq pa'aliyiti', 'milletler ittipaqliqi terbiyesi' ni kücheytip, her qaysi milletlerni birleshtürüsh, jungxu'a milliti jem'iyitining éngini chongqur yiltiz tartquzush kérek. Islam dinini xitaylashturushni ilgiri sürüp, ashqunluqni tizginlesh xizmetlirini yenimu chongqurlashturush kérek. . ."

Chet'ellerdiki közetküchilerning qarishiche, chén chüen'goning sözliri xitay hökümitining Uyghurlarni assimlatsiye qilip yoqitishni meqset qilghan siyasetlirini kücheytip ijra qilidighanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet