Da'iriler atalmish "Chet'el jasusliri"ning Uyghur rayonida qolgha chüshkenlikini xewer qildi

Muxbirimiz méhriban
2017-04-11
Share

Xitayning "Junggo xewerler tori"ning 11-apirildiki sanida"Chet'el jasusi shinjang herbiy rayonida torgha chüshti" serlewhilik xewer bérilip, bultur yaz peslide dalada pa'aliyet élip barghuchi qiyapitige kiriwalghan bir chet'ellik yashning posta turuwatqan xitay qarawulini süretke tartiwatqan neq meydanda bayqilip, tekshürülüsh arqiliq uning resim apparatidin herbiy ishlargha a'it uchurlarning bayqalghanliqi" xewer qilindi. Emma xewerde atalmish chet'el jasusining kimliki tilgha élinmidi.

Mezkur xewerning xitayning béyjing shehiride 10-aprél élan qilin'ghan "Chet'ellik jasuslar heqqide uchur bilen teminligüchilerge 10 ming yüendin 500 ming yüen'giche mukapat bérilidighanliqi" heqqidiki xewerdin kéyin bérilishi diqqet qozghidi. "Béyjing géziti" ning 10-apréldiki xewiride, béyjing shehiri qiziq liniye téléfoni tesis qilip, chet'el jasuslirini pash qilghan puqralargha 10 ming yüendin 500 ming yüen'giche mukapat bérilidighanliqini élan qilghanliqi xewer qilinip, xitayda chet'el jasuslirigha qarshi yéngi tedbirlerni élish texirsiz mesile bolup qalghanliqi tekitlen'gen.

Amérika qatarliq gherb elliride birnechche yildin buyan bayqalghan iqtisadiy -pen téxnika uchurliri hetta herbiy téxnika uchurlirini oghrilighan xitay jasusliri pash bolup, jazalan'ghanliqi heqqidiki xewerler köpeygen mezgilde, xitay taratqulirida tekitliniwatqan atalmish "Chet'el jasusliri" gha zerbe bérish mesilisi, xelq'ara taratqularningmu diqqitini qozghidi. Firansiye agéntliqining 10-apréldiki xewiride bu heqte toxtilip, "Xitay hökümiti da'im chet'elliklerni xitaygha qarshi niyiti bar, dep eyiblep, bu arqiliq özining axbarat erkinliki we kishilik hoquqqa xilap heriketlirini aqlap kelgen" liki tilgha élin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet