Xitay chéchiniyedin térrorluqqa qarshi amanliq küchlirini terbiyilep bérishni telep qilghan

Rusiye axbarat wasitilirining ashkarilishiche, chéchiniye wekiller ömikining yéqinda ürümchige qilghan ziyaritide xitay terep chéchiniyedin térrorluqqa qarshi amanliq küchlirini terbiyilep bérishni telep qilghan.

Chéchiniye prézidénti ramizan qadirofning bixeterlik ishliri yardemchisi, chéchiniye güdürmes anti térrorluq meshq merkizining bashliqi dani'al martinof chéchiniye bixeterlik wekille ömikini bashlap, ürümchini ziyaret qilghan hem xitay terep bilen söhbet élip barghan idi. Dani'al martinof rusiye axbarati-“Gazita ru”gha bergen uchurida, xitay terep bilen ötküzgen söhbetning bezi mezmunlirini ashkarilighan.

Uning bildürüshiche, xitay terep chéchiniye bilen térrorluqqa qarshi hemkarliq élip bérishqa alahide qiziqidiken. Dani'al martinof, xitay terepning térrorluqqa qarshi amanliq küchlirini chéchiniyediki güdürmes meshiq merkizide terbiyilep bérishni telep qilghan hem meshiqni derhal bashlashqa teyyar ikenlikini bildürgen.

Biraq dani'al martinofning bildürüshiche, u chéchiniyening xitay amanliq küchlirini terbiyilep bérishi mesile emesliki, emma buning üchün xitay bilen rusiyening alaqidar resmiyet we kélishimlerni tamamlishi kéreklikini bildürgen.

Xitay merkizi siyasiy qanun komitéti sékrétari méng jyenju bu yil 5‏-ayda chéchiniyeni ziyaret qilip, grozni bilen térrorluqqa qarshi hemkarliq arzusini ipadiligen. Buninggha jawaben chéchiniye wekiller ömiki ürümchini ziyaret qilghan. Emma bu, xitay Uyghurlarni basturushta chéchiniyeni ülge qilishqa teyyarliq qiliwatamdu, dégen so'al peyda qilghan.