Uyghur aptonom rayonidin yene 7 neper emeldar chiriklik bilen tutup turulup tekshürülmektiken

Muxbirimiz qutlan
2017-01-01
Élxet
Pikir
Share
Print

Igilinishiche, Uyghur aptonom rayonluq intizam tekshürüsh komitéti yéqinda omumiy uqturush chiqirip, 7 neper emeldarning "Intizamgha éghir derijide xilapliq qilghanliqi" sewebidin tekshürüliwatqanliqini bildürgen.

Xelq torining bu heqtiki xewirige qarighanda, omumiy uqturush chiqirilip tekshürüliwatqan 5 neper emeldar xoten wilayetlik xelq qurultiyi xizmet komitéti partiye guruppisining sabiq mu'awin sékritari ötkür alim, altay sheherlik partkomning sékritari wang shibin, ürümchi nahiyelik ma'arip idarisi partkomining sabiq sékritari gaw yongching we ürümchi nahiyelik ma'arip idarisining sabiq bashliqi jang yüxong, qumul sheherlik déhqanchiliq idarisi uruqchiliq meydani partiye yachéykisining sabiq sékritari fang yungchang we mezkur uruqchiliq meydanining sabiq bashliqi jang wéyshing qatarliqlar iken.

Tutup turup tekshürüliwatqan yoqiriqi 7 neper emeldarning 5 nepiri xitay, ikki nepiri Uyghur bolup, közetküchiler yene bir qétim rayonda jazalan'ghan yaki délosi tekshürüliwatqan xitay emeldarlarining mutleq köp qismining "Parixorluq" we "Chiriklik" ke chétiliwatqanliqini tekitlimekte.

Téxi aldinqi hepte Uyghur aptonom rayonluq intizam tekshürüsh komitéti uqturush chiqirip, xoten wilayetlik memuriy mehkimining mu'awin waliysi, qoshumche guma nahiyelik partkomning sékritari shén yining "Intizamgha éghir derijide xilapliq qilish" jinayiti bilen tutup turup tekshürüliwatqanliqini bildürgen idi. Undin bashqa, xitay taratquliri yene bu yil 4-ayda xoten sheherlik partkomning sékritari chén ywenxwaning "Intizamgha éghir derijide xilapliq qilish" jinayiti bilen jazalan'ghanliqini xewer qilghan idi.

Muhajirettiki siyasiy analizchilar, Uyghur diyarida délo turghuzulup tekshürüliwatqan xitay emeldarlirining "Parixorluq" we "Chiriklik" ke, emma yerlik Uyghur emeldarlarning bolsa "Siyasiy meydan" mesilisige chétiliwatqanliqini ilgiri sürmekte.

Toluq bet