El jezire xitayning Uyghurlarni choshqa béqish we choshqa göshi yéyishke mejburlawatqanliqini xewer qildi

2020-12-04
Share

Qatardiki el jezire téléwiziyesi 4-dékabir küni xitayning Uyghur élide chong kölemlik choshqa férmilirini qurup, Uyghur musulmanlirini choshqa béqishqa we choshqa göshi yéyishke mejburlawatqanliqini xewer qildi. El jezirening xewiride gérmaniyelik Uyghurshunas adriyan zénzning sözi neqil keltürülüp, Uyghur élide yéza igilik tereqqiyatining "Dinsizlashturush" ning birqismigha aylan'ghanliqi, Uyghur élide choshqa baqmichiliqini ilgiri sürüsh we kéngeytish üchün aktip tirishchanliq körsitiliwatqanliqi tekitlen'gen.

Xewerde Uyghur aptonom rayonining re'isi shöhret zakirning 2019-yili 11-ayda aptonom rayonini "Choshqa baqmichiliq bazisi" gha aylandurimiz, dégenliki, lékin Uyghurlarning buni turmush usulimizgha xilapliq, dep qarawatqanliqi tekitlen'gen. Xewerde yene ahalisining 90 % ni musulmanlar teshkil qilidighan qeshqer kona sheher nahiyesidiki 25 ming kwadrat métirliq bir orun'gha choshqa férmisi qurulghanliqi, férmida yiligha 40 ming choshqa béqilidighanliqi, férma qurush kélishmining bu yil 23-aprél yeni del ramizanning 1-küni imzalan'ghanliqi bildürülgen.

Xewerde tekitlinishiche, adriyan zénz bu qurulushni "Shinjang xelqining medeniyiti we diniy étiqadini pütünley yoqitishqa urunush herikitining bir qismi" dégen. Uning bildürüshiche, bu pilan "Dindin xali qilish istratégiyesining bir parchisi bolup, Uyghurlarni dindin xali qilish, ularni kommunistik partiyege egishishke, yaki dinsiz bolushqa yétekleshning bir qismi" iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet