CIA Yéngi diréktor namzati wilyam j. Bérns: "Xitaygha yenimu köp meblegh we adem küchi arqiliq taqabil turushimiz kérek"

Muxbirimiz irade
2021-02-25
Share

Amérika prézidénti jow baydénning amérika merkiziy axbarat idarisi CIA gha rehberlik qilishqa körsetken namzati wilyam j. Bérns xitaygha yenimu köp meblegh we adem küchi arqiliq taqabil turush zörürlükini bildürgen.

"Nyu-york waqti géziti" ning bildürüshiche, wilyam burnis 24-féwral küni amérika dölet mejliside échilghan bahalash yighinigha qatnashqanda, amérikaning dölet xewpszliki heqqide toxtalghanda xitayni "Düshmen küch we amérika sitixbarat sahesining eng chong gyo-siyasiy riqabetchisi," dep körsetken.

Burnis ependi guwahliq bérish yighinida amérikagha reqib boluwatqan xitay hökümitining pozitsiyesiningmu intayin qebihlikini éytqan.

U mundaq dégen: "Méningche, xitay bilen bolghan riqabitimiz uzun musapiliq bir riqabet. Bu sowét ittipaqi bilen soghuq munasiwetler urushi mezgilidiki riqabetke oxshimaydu, chünki u asasliqi xewpsizlik we idiye jehettin élip bérilghan idi, biraq bu qétimqisi yoqiri pen-téxnika iqtidarigha we iqtisadiy küchke ige bir dölet bilen bolidighan riqabettur."

Burnis ependi eger wezipige teyinlen'gen teqdirde özining xitaygha qaritilidighan istixbarat heriketlirini küchlendürdighanliqini wede qilghan. U buning üchün téximu köp mebleghqe we küchlük xitay tili sewiyesi bolghan xadimlargha éhtiyajliq ikenlikini, téxnikida yéngiliq yaritilishi kéreklikini bildürgen.

"Nyu-york waqti géziti" ning bildürüshiche, burnis ependi tonulghan pishqedem déplomat bolup, u ilgiri amérikaning i'ordaniyede we rosiyede turushluq bash elchisi bolghan, shundaqla amérika tashqiy ishlar ministirliqining aliy derijilik xadimi bolup xizmet qilghan iken. Shunga u dölet mejliside her ikki partiye ezalirining qollishigha érishken bolup, uning amérika merkiziy axbarat idarisining bashliqliq wezipisige layiq körülüp, wezipige teyinlinishi éhtimali yuqiri iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet