Dalay lamaning amérikidiki dangliq cholpan gaga xanim bilen uchrishishi xitayning oghisini qaynatqan

Birleshme agéntliqning xewirige qarighanda, tibetlerning rohaniy dahiysi dalay lama yekshenbe küni indi'anapolis shehiride ötküzülgen amérikidiki sheher bashliqlirining yighilishigha daxil bolup, 200 din artuq sheher bashliqigha nutuq sözligen.

Dalay lama mezkur nutqidin kéyin amérikidiki dangliq cholpan gaga xanim bilen söhbetleshken. Söhbettin kéyin uning bir qisim körünüshliri féysbuk qatarliq ijtima'iy taratqulargha qoyulup, küchlük tesir peyda qilghan.

Xitay hökümiti derhal tashqi ishlar ministirliqining bayanatchisi xung léy arqiliq inkas qayturup, dalay lamagha hujum qozghighan.

Xung léy mundaq dégen: “Dalay lamaning bashqa döletlerni tinimsiz ziyaret qilishi we özi barghanliki ellerde her xil pa'aliyetlerde bolushining tüp meqsiti özining tibet musteqilliqi pilanini sehnige élip chiqishtur, xalas. Biz xelq'ara jem'iyet we awamning uning heqiqiy mahiyitini tonuwélishini ümid qilimiz!”

Halbuki, dalay lama xitay hökümitining qattiq eyibleshlirining eksiche, dunyadiki toqunushlarni hel qilishning eng yaxshi usulining muhebbet we héssidashliqtin ibaret insaniyettiki ichki qimmette ikenlikini tekitligen.

Dalay lama ikki heptining aldida aqsarayda amérika prézidénti barak obama bilen körüshken bolup, uning yekshenbe küni dangliq cholpan gaga xanim bilen söhbetlishishi xitay hökümitini téximu bi'aram qilghan.

Uning üstige dalay lamaning indi'anapolistiki nutqida nöwettiki toqunushqa tolghan dunyada insaniy muhebbet bilen héssidashliqtin ibaret dunyawi meniwi qimmetni tikleshte öz ümidini amérikigha baghlaydighanliqi heqqidiki sözliri xitayning oghisini téximu qaynatqan.