180 Дин артуқ тәшкилат бирликтә дунядики даңлиқ маркиларни уйғурларниң мәҗбурий әмгики билән ясалған мәһсулатлардин қол үзүшкә чақирди

Мухбиримиз ирадә
2020-07-23
Елхәт
Пикир
Share
Принт

Хәлқарадики кишилик һоқуқ органлири ортақ һалда дуняви кийим-кечәк маркилирини уйғур елидики мәҗбурий әмгәккә көз юммаслиққа чақирған.

Әнглийәдә чиқидиған «муһапизәтчи» гезити 23-июл күни елан қилған хәвиридә көрситилишичә, 180 дин артуқ кишилик һоқуқ тәшкилатидин тәшкилләнгән тәшкилатлар бирлики дунядики көплигән мода кийим-кечәк маркилири вә парчә сатқучилар милйонлиған уйғур хәлқи мәҗбурий әмгәккә селиниватқан кишилик һоқуқ дәпсәндичиликигә четишлиқ, дәп көрсәткән. Улар уйғур елидә инсанийәткә қарши еғир җинайәт садир болуватқан болсиму, бирақ һәрқайси даңлиқ кийим-кечәк маркилириниң буниңға қаримай, йәнила хитайда мәҗбурий әмгәк асасида ишләпчиқирилған пахта вә пахта мәһсулатлирини ишлитишни давам қиливатқанлиқини билдүргән.

Юқириқи бу тәшкилатлар бирлики уйғур елидики бу зор көләмлик мәҗбурий әмгәк лагерлирини иккинчи дуня урушидин буян инсанийәт тарихида көрүлгән әң зор көләмлик тутқун, дәп атиған.

Уларниң мөлчәрлишичә, йәр шаридики даңлиқ кийим-кечәк маркилири пахта хам әшясида уйғур елини асасий мәнбә қилған болуп, дуняниң һәр қайси җайлирида сетиливатқан һәр бәш пахта мәһсулатниң бирини уйғур елидики мәҗбурий әмгәк вә кишилик һоқуқ дәпсәндичиликигә мунасивәтлик дәп қарашқа болидикән.

«Муһапизәтчи» гезитиниң хәвиригә қариғанда, хитай дунядики әң чоң пахта ишләпчиқарғучи дөләт болуп, у ишләпчиқарған пахтиниң 84 пирсәнти уйғур елидин чиқидикән. Уйғур елидә ишләпчиқирилған пахта вә йиплар баңладаш, камбоджа вә вийетнам қатарлиқ дөләтләрдики кийим-кечәк завутлирида кәң қоллинилидикән. У йәнә пахта вә йип тоқумичилиқ вә өй җаһазлиридиму ишлитилидикән. Бу һәптә «ню-йорк вақти гезити» дуняниң һәрқайси җайлирида кишиләр тақаватқан маскиларниңму уйғур елидики мәҗбурий әмгәк асасида ишләпчиқирилғанлиқини ашкарилиған иди.

Хәвәрдә ейтилишичә, кишилик һоқуқ органлири бирләшмиси уйғурлар мәҗбурий әмгәккә селиниватқан тәминләш зәнҗирлиридин мал тәминләшкә давам қиливатқан маркиларниң тизимликини тизип чиққан болуп, улар «Calvin Klein ,Gap, C&A, Adidas, Muji, Tommy Hilfiger» қатарлиқ маркиларни өз ичигә алидикән.

Юқириқи 180 дин артуқ тәшкилат ичидә 70 дин артуқ уйғур тәшкилатлири бар икән. Бу тәшкилатлар бирлики йәнә хәлқарадики қул әмгикигә қарши тәшкилатлар вә әмгәк һоқуқи тәшкилатлиридин тәркиб тапқан болуп, улар өзлириниң бирләшмә баянатида йәр шаридики даңлиқ маркиларниң һәммисиниң дегүдәк уйғурлар учраватқан мәҗбурий әмгәккә четишлиқ икәнликини әйиблигән шундақла уларни бир йил ичидә мәҗбурий әмгәккә мунасивәтлик барлиқ мәһсулат вә материялларни йоқитишқа, уйғурларға қаритилған ирқий қирғинчилиқ түсидики һәрикәтләрдә рол елиштин сақлинишқа чақирған.

Пикирләр (0)
Share
Толуқ бәт