Данийә яшанғанлар күтүнүш фонди уйғурларға қилиниватқан зулумни нәзәрдә тутуп хитай мәблиғидин ваз кәчкән

Мухбиримиз ирадә
2020-09-24
Елхәт
Пикир
Share
Принт

Данийәниң Akademiker Pension намлиқ күтүнүш фонди хитайниң кишилик һоқуққа қиливатқан дәпсәндичилики сәвәбидин хитай салған мәбләғни чиқириветидиғанлиқини җакарлиған. Бу дегәнлик һөкүмәт зайоми вә пай чекиниң җәмий 400 милйон данийә крони йәни (53.7 Милйон явро) төвәнлигәнликидин дерәк беридикән.

Явропадики IPE намлиқ иқтисад хәвәрлири гезитиниң билдүрүшичә, фонд бу һәқтики баянатида өзлириниң хитайниң мәблиғини алмаслиқни қарар қилишиға «хитайниң хоңкоң үчүн чиқарған бихәтәрлик қануни, бир милйондин артуқ уйғурниң қайта тәрбийәләш лагерлириға қамилиши, хитайниң даим өлүм җазаси иҗра қилиши вә аз санлиқ милләтләргә вә сиясий өктичиләргә зиянкәшлик қилиши» дәк амилларниң сәвәб болғанлиқини ейтқан.

«Akademiker Pension» Ниң баш иҗраийә әмәлдари җенс мунч холст: «биз хитайни узундин буян көзитип келиватимиз. Һәммигә аянки, бу дөләт кишилик һоқуқни системилиқ һалда дәпсәндә қилиду. Биз әмди буниңға қарап туралмаймиз» дегән.

У йәнә фонд әзалириниң яхши вә раһәт бир пенсийә һаяти сүрүшидәк иҗтимаий мәсулийәт үстигә қурулған бир фондниң хитайдәк мәсулийәтсиз һакимийәтниң мәблиғини елишиниң тоғра болмайдиғанлиқини ейтқан.

Техи йеқинда йәни 19-сентәбир күни, хелсинки комитети, рафту фонди җәмийити, норвегийә қәләмкәшләр җәмийити, норвегийә уйғур комитети, уйғур кишилик һоқуқ қурулуши вә дуня уйғур қурултийи қатарлиқ 7 тәшкилатниң чақириқ қилиши билән норвегийә һөкүмити нефит фонди хәйкаң дигитал вә дахуа технологийә ширкәтлиригә салған бир милярд 200 милйон киронлуқ мәблиғини қайтуруп алғанлиқини җакарлиғаниди.

Юқиридики тәшкилатлар норвегийә һөкүмитиниң қарарини қизғин қарши алған. Норвегийә уйғур комитети бу һәқтики баянатида «биз бу нәтиҗини шәрқий түркистанда езилгән кишиләрниң ғәлибиси дәп қараймиз. Шуниң билән бир вақитта хитай һөкүмитиниң зулумиға ортақ болған башқа ширкәтләрниңму охшаш ақивәткә қалдурулушини үмид қилимиз» дегән.

Дуня уйғур қурултийи рәиси долқун әйсаму юқиридики қарарни қарши елиш билән биргә, башқа мәбләғ салғучи ширкәтләр вә алақидар орунларниму мушуниңға охшаш принсипал һәрикәт қоллинишқа чақирди.

Пикирләр (0)
Share
Толуқ бәт