Җон балтон:«америка һөкүмити хитайниң деңиз қатниши чәклимисигә қарши туриду!»

Мухбиримиз әзиз
2018-11-13
Елхәт
Пикир
Share
Принт

Хитай һөкүмити җәнубий хитай деңизи тәвәсидә земин даваси қилиш билән биргә, бу җайдин өтидиған деңиз қатнишини контрол қилмақчи болғанда америка һөкүмити өзлириниң буниңға қәтий қарши туридиғанлиқини ашкара ипадилиди.

13-Ноябир күни ақ сарайниң дөләт хәвпсизлик ишлири мәслиһәтчиси җон балтон сөз қилип хитай һөкүмитиниң җәнубий хитай деңизидики деңиз қатнишиға бәлгилимә қоймақчи болғанлиқини қаттиқ әйиблиди һәмдә хитай һөкүмитигә бу тоғрилиқ агаһландуруш бәрди. «Вал стрет журнили» гезитиниң шу күндики хәвиридә ейтилишичә, хитай һөкүмити филиппин вә вийетнамға тәвә болған деңиз тәвәликидә қанунсиз болған сүний аралларни қуруп чиқиш билән биргә, бу җайдин өтидиған хәлқаралиқ қатнаш линийәсини чәклимәкчи болған.

Сингапорда «шәрқий җәнубий асия әллири бирләшмиси» ниң йиллиқ йиғиниға қатнишиватқан җон болтон бу һәқтә сөз қилип «америка һөкүмити хитай вә башқа дәвагәрләрниң җәнубий хитай деңизидин өтидиған қатнаш линийәсигә чәк қоймақчи болушиға қәтий қарши туриду. Америкиниң һәрбий парахотлири бу җайларда чарлаш мәшғулатини давам қиливериду» дегән.

Мәзкур йиғинға қатнишиватқан хитай баш министири ли кечяң болса бу һәқтә ипадә билдүрүп «биз җәнубий хитай деңизи қатнишиға мунасивәтлик қаидиләрни түзүп чиқишқа қатнишиватимиз. Әмма биз бу районда зомигәрлик орнатмақчи әмәс. Әксичә бизниң мәқситимиз бу районға техиму зор тинчлиқ елип келиш» дегән.

Һалбуки хитай һөкүмитиниң җәнубий хитай тәвәсидики бу хил қилмишиға «шәрқий җәнубий асия әллири бирләшмиси» гә әза дөләтләрниң һәммисила дегүдәк қарши чиқиватқан болуп, шулар қатаридики малайсия, бируней, һиндонезийә қатарлиқ дөләтләр изчил «хитай бизгә тәһдит пәйда қилмақта» дәп қарап кәлмәктә икән.

Түнүгүн америкидики CNBC агентлиқиниң риясәтчиси җим крәймер америка билән хитайниң мунасивити һәққидә тохтилип, икки тәрәп оттурисида пикир бирлики һасил болуштин үмид күтмәйдиғанлиқини билдүргән. Шуниңдәк «мениңчә биз хитайға қарши җәңгә атландуқ, десәкму болиду. Йәнә келип бу җәң ахирлашмиди. Һалбуки бу җәңни ялғуз сода уруши, дәп аташ мувапиқ әмәс» дегән иди.

Пикирләр (0)
Share
Толуқ бәт