Хитай даирилири қағилиқ наһийисидә қанунсиз диний паалийәтләргә қарши туруш тәшвиқат хизмитини башлиди

Хитай милләтләр вә дин хизмити тор бетидин мәлум болушичә, қағилиқ наһийилик һөкүмәт йеқиндин буян “қанунсиз диний паалийәтләргә қарши туруш хизмәт пилани” вә тәшвиқат тәрбийә хизмитини наһийә миқяси бойичә кәң қанат яйдуруп, наһийидики һәр қатлам, һәр саһәдики алаһазәл 5000 кишини мәхсус қанунсиз диний паалийәтләргә қарши туруш өгиниш курслириға орунлаштурған.

Қағилиқ наһийиси хитай һөкүмитиниң бу хил динни чәкләш сиясити әң күчлүк йүргүзүлүватқан орунларниң бири. Өткән йил 2-айниң 28-күни қағилиқта пичақлиқ һуҗум қилиш вәқәси йүз берип, хитайлардин 15 киши өлгән вә уйғурлардин 7 нәпәр һуҗумчи нәқ мәйданда етип ташланған иди. Кейин йәнә 1-өктәбир күни һәрбий газармиға мотсиклит билән һуҗум қилишқа охшаш бир қатар зәнҗирсиман вәқәләр мәйданға кәлгән.

Хитай даирилири шундин кейин бу наһийини башқуруш тәдбирлирини чиңитиш билән бирликтә, наһийидә омумйүзлүк һалда милләтләр иттипақлиқи һәрикити, қанунсиз диний паалийәтләргә қарши туруш һәрикити, мәдәнийәтлик, бәхтлик қағилиқлардин болуш дегәндәк һәрикәтләр арқилиқ наһийиниң вәзийитини контрол қилишқа урунуп кәлмәктә. Әмма чәтәлләрдики көзәткүчиләр, хитай даирилириниң бу хил контрол қилиш һәрикәтлириниң уйғур хәлқиниң наразилиқини ашуруп, вәзийәтни техиму кәскинләштүридиғанлиқини билдүрмәктә.