Америка хәлқара диний әркинлик комитети хитайни диний әркинликкә хилаплиқ қилғучи дөләтләр тизимликигә киргүзүшни тәвсийә қилди

Мухбиримиз әркин
2019-04-29
Елхәт
Пикир
Share
Принт
cover-photo.jpg
cover-photo.jpg
Photo: RFA

Америка хәлқара диний әркинлик комитети 29‏-апрел күни йиллиқ хәлқара диний әркинлик доклати елан қилип, хитайниң уйғур районида диний әркинликни қаттиқ дәпсәндә қиливатқанлиқи, шуңа американиң уни бу йил йәнә диний әркинлики алаһидә диққәт қилинидиған 1‏-дәриҗилик дөләтләр тизимликигә киргүзүшини тәвсийә қилған. Әгәр америка ташқи ишлар министирлиқи бу тәклипни қобул қилса, бу хитайниң йеқинқи 20 йилдин бери изчил бу тизимликкә киргүзүлүши болуп қалиду.

Америка хәлқара диний әркинлик комитети 226 бәтлик доклатида, америка һөкүмитидин йәнә диний әркинлик, кишилик һоқуқни америка-хитай сода сөһбитиниң күнтәртипигә елип киришни, хитайдики тил вә мәдәнийәт мираси вә диний кимликини сақлап қелишқа тиришиватқан милләт вә җамаәтләргә ярдәм беришни күчәйтишни, хитайдин кәлгән диний етиқади еғир зиянкәшликкә учриған мусапир вә сиясий панаһланғучиларниң кәчүрмишлирини һөҗҗәтләштүрүшни тәләп қилған.

Доклатта йәнә, американиң иттипақдаш дөләтләр билән биллә хитайниң диний әркинликни бастурушиға қарита нишанлиқ ембарго йүргүзүш, виза чәклимиси қоюш, аммиви дипломатийә вә башқа тәдбирләрни қоллинип, униңға инкас қайтуруш тәвсийә қилинған. Мәзкур комитетниң илгири сүрүшичә, америка ташқи ишлар министирлиқи йәнә башқа дөләтләр вә б д т мусапирлар мәһкимиси билән һәмкарлишип, диний җәһәттә зиянкәшликкә учриған панаһланғучиларниң хитайға қайтуруп берилишиниң алдини елиши, хитайниң америкадики тәсирини тосуши керәк икән. Доклатта йәнә америка дөләт мәҗлисигә бәзи тәвсийәләр берилгән болуп, униңда хитайға илғар техникиларни експорт қилиш, болупму назарәт қилиш техникаси вә биометирийәлик әсвабларниң експортини чәкләшни күчәйтиш тәләп қилинған.

Йеқинда америкадики бәзи ширкәтләрниң хитайға бәзи илғар техникиларни сетип, униң уйғур районида DNA амбери қуруши, назарәт системиси бәрпа қилишиға васитилик түрткә болғанлиқи ашкариланған. Бу америка дөләт мәҗлисидики марку рубио, баб мәнәндәз, там созе, кристофир симистәк бәзи кеңәш вә авам палата әзалириниң күчлүк тәнқидигә учриған. Улар америка сода министири виллбор русқа хәт йезип, униң бу хил техникиларни хитайға експорт қилишини чәклишини тәләп қилған иди.

Пикирләр (0)
Share
Толуқ бәт