Америка һөкүмитиниң хәлқара диний әркинлик һәққидики буйруқи қизғин алқишланди

Мухбиримиз әзиз
2020-06-03
Елхәт
Пикир
Share
Принт

2-Июн күни америка президенти доналд трамп америка һөкүмитиниң хәлқара диний әркинликни илгири сүрүш хизмитигә йетәкчи болидиған иҗраийә буйруқини елан қилғаниди. Мәзкур буйруқта доналд трамп диний әркинликниң америкадики биринчи орунда туридиған әркинлик икәнликини, шу сәвәбтин дуня миқясидики барлиқ диний әркинлик һәқлириниң америка ташқи сияситидә алди билән нәзәргә елинидиған амил болуши лазимлиқини билдүрди.

Сәккиз бөлүмгә айрилған мәзкур президент буйруқи хәлқаралиқ мәнидин тарқитилған. Униңда тәпсилий қилип барлиқ диний җамаәт вә диний муәссәсәләрниң дәхли-тәрз қилишқа болмайдиған муқәддәс һәқләр икәнлики, хәлқара диний әркинлик хизмити үчүн аҗритилидиған мәбләғниң көпәйтилидиғанлиқи, шуниңдәк хәлқара диний әркинликни америка дипломатийиси билән муҗәссәмләштүрүш лазимлиқи һәмдә малийә министириниң диний әркинликни чәклигән дөләтләргә қарита «йәршари магнетиски қануни» вә башқа җаза тәдбирлирини иҗра қилидиғанлиқи алаһидә тәкитләнгән. Буниңға қошумчә һалда америка ташқи ишлар министириниң 180 күн ичидә хәлқара динйй әркинликни алға сүрүш һәққидики тәпсилий пилан лайиһәсини тәйярлайдиғанлиқи ейтилған.

Вашингтон шәһиридики хәлқара диний әркинлик комитети мәзкур президент буйруқини қизғин алқишлайдиғанлиқини билдүрди. Комитет рә’‍иси тоний перкинс бу һәқтики баянатида «биз президент трампниң хәлқара диний әркинликни дөләт бихәтәрлики вә ташқи сиясәт саһәсидики муһим амиллар қатариға тизғанлиқини қизғин қоллаймиз» деди. Мәзкур комитет йиллардин буян америка һөкүмитини дуняви миқяста диний әркинликни алға сүридиған бир омумий истратегийә түзүп чиқишқа дәвәт қилип келиватқан болуп, бу қетимқи президент буйруқиниң тарқитилиши дәл мушу чақириққа қайтурулған җаваб тәриқисидә оттуриға чиққан.

Америка хәлқара диний әркинлик комитетиниң йиллиқ доклатлирида хитай һөкүмити йиллардин буян диний етиқад һәқлирини дәпсәндә қилиштики әң қәбиһ дөләтләр қатарида тилға елиниватқан болуп, мәзкур буйруқниң бу җәһәтләрдики хизмәтләргә йеңи һаяти күч елип келиши үмид қилинмақтикән.

Пикирләр (0)
Share
Толуқ бәт