Amérika xelq'ara diniy erkinlik komitéti (USCIRF) amérika hökümiti élan qilghan "Shinjangdiki soda teminat zenjiri heqqide tewsiye" ni qarshi alidighanliqini bildürdi

Muxbirimiz irade
2020-07-02
Élxet
Pikir
Share
Print

Amérika xelq'ara diniy erkinlik komitéti (USCIRF) bayanat élan qilip, amérika tashqi ishlar ministirliqi, xezine ministirliqi, soda we dölet xewpsizlik ministirliqining Uyghur, qazaq we bashqa musulman milletlerning mejburiy emgikige tayiniwatqan teminlesh zenjirlirini agahlanduridighan soda teminat zenjiri heqqidiki qararini muhim qedem, dep atidi.

1-Iyul küni amérika "Shinjangdiki soda teminat zenjiri heqqide tewsiye" namliq zor hejimlik höjjetni élan qilip, xitay bilen soda qiliwatqan amérika shirketlirini Uyghur diyaridiki mejburiy emgek bilen chétilip qélish éhtimali bolghan teminat zenjiridin hoshyar bolushqa chaqirghan. Tewsiyenamide xitay hökümitining Uyghurlarni zor kölemde xitay ölkiliridiki zawutlargha ishchiliqqa yötkep, ishlepchiqirish séxlirigha emgekke orunlashturghanliqi, shu sewebtin amérikadiki soda shirketliri, ilmiy teshkilatlar, shexsler we meblegh salghuchilarning bu xil zulumlargha shérik bolup qalmasliqi üchün xitay shirketliri bilen soda qilishtin ilgiri ashu shirketning mehsulatliri bu xil mejburiy emgek bilen qanchilik baghlinishqa ige ikenlikini tekshürüp körüsh lazimliqi tekitlen'gen.

Amérika xelq'ara diniy erkinlik komitétining komissarliri nuri türkel we gariy bawir qatarliqlar bayanattiki sözide yuqiriqi qararning intayin muhimliqini tekitlep: "Bu Uyghur qatarliq musulman xelqler uchrawatqan zamaniwi qulluqqa qarshi küresh yolida élin'ghan muhim qedem. Soda teminat zenjiri heqqide tewsiye netijiside amérika shirketliri emdi teminlesh zenjirliride yüz bériwatqan éghir kishilik hoquq depsendichilikini körmeske salalmaydu," dédi.

Ular bayanatida yene amérikadiki 4 ministirliq birlikte chiqarghan bu qarar arqiliq amérika hökümitining özining bu mesilige jiddiy qarawatqanliqini namayan qilghanliqini tekitlesh bilen birge, dunyaning bashqa jayliridiki zor tijaret sahesini, bolupmu dangliq kiyim-kéchek markisi we parche satquchilarnimu xitay kompartiyesining irqiy qirghinchiliq tüsini alghan siyasetliri, diniy basturushi we Uyghur rayonidiki mejburiy emgek siyasitini dawam qilishigha yantayaq bolmasliqqa chaqirdi.

Amérika kéngesh palatasi ezasi marko rubiyo bu heqte tiwittérdiki uchurida yuqiriq qararni qollash bilen birge, özi tonushturghan "Uyghurlarni mejburiy emgekke sélishni cheklesh qanuni layihesi" ning derhal maqullinishi kéreklikini eskertti.

Toluq bet