Amérika xelq'ara diniy erkinlik komitéti Uyghurargha diniy ziyankeshlik qilghuchilarni jawabkarliqqa tartishni telep qildi

Muxbirimiz erkin
2020.08.21

Amérika xelq'ara diniy erkinlik komitéti “Xelq'ara diniy étiqad asasidiki zorawanliq heriketlirining qurbanlirini xatirilesh küni” munasiwiti bilen bayanat élan qilip, Uyghurlargha diniy ziyankeshlik qilghuchilarni jawabkarliqqa tartishni telep qildi. Mezkur teshkilatning tekitishiche, xelq'ara jem'iyet diniy ziyankeshlik qilghuchilarni jawabkarliqqa tartip, ziyankeshlikke uchrighuchilar üchün adaletni ishqa ashurushi kérek iken.

Amérika xelq'ara diniy erkinlik komitéti 21-awghust élan qilghan bayanatida mezkur komitétning re'isi géyl manchin “Xelq'ara jem'iyet öz ara hemkarliship, ziyankeshlik qilghuchilarni jawabkarliqqa tartish arqiliq ziyankeshlikke uchrighuchilar üchün adaletni ishqa ashurushi, hökümetler heriketke kélip, irqiy qirghinchiliq we bashqa wehshiliklerge hergiz yol qoymaydighanliqini namayan qilishi kérek” dégen.

Bayanatta yene xelq'ara diniy erkinlik komitétining mu'awin re'isi tipmi pérkinson bu künni toghra xatirilesh üchün dölet yaki gheyriy dölet éléméntlirining diniy toplargha qaritilghan hujumlirini échip tashlash kéreklikini bildürüp: “Bu da'éshning iraqdiki yezidiler, xristiyanlarge qaritilghan irqiy qirghinchiliqi, xitaydiki Uyghurlargha qaritilghan xorlash, birmadiki rohin'ga musulmanlirigha we xristiyanlirigha qaritilghan keng kölemlik wehshiyliklerni öz ichige alidighanliqi” ni bildürgen.

B d t 2019-yili 13-may küni qarar maqullap, her yili 22-awghustni “Xelq'ara diniy étiqad asasidiki zorawanliq heriketlirining qurbanlirini xatirilesh küni” qilip békitken. Bu yil 22-awghust buning 2-qétimliq xatire künidur.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.