Америка дөләт мәҗлисиниң доклатида, американиң бирла вақитта русийә вә хитай билән уруш қилиш тәйярлиқи көрүши тәләп қилинди

Вашингтондин мухбиримиз әркин тәйярлиди
2023.10.13

Америка дөләт мәҗлисиниң бир комитети 12-өктәбир доклат елан қилип, американиң бирла вақитта русийә вә хитайға қарши икки сәптә уруш қилишқа тәйярлиқ көрүши керәкликини билдүргән. Америка дөләт мәҗлиси “истратегийәлик вәзийәт комитети” ниң 145 бәтлик доклатида қәйт қилинишичә, шуңа америка өзиниң һәрбий күчини кеңәйтиши, иттипақдаш дөләтләр билән болған мунасивити күчәйтиши, ядро қораллирини заманивилаштурушни тезлитиши, хитай вә русийә билән бирла вақитта уруш партлап қелишқа тәйярлиқ қилиши керәк икән.

Бу доклат американиң хитай билән мунасивити тәйвән вә башқа мәсилиләр сәвәбидин, русийә билән болған мунасивити украина уруши сәвәбидин өткүрлишип кәткән бир пәйттә елан қилинған.

Ройтерс агентлиқиниң билдүрүшичә, бу доклатни тәйярлашқа қатнашқан бир америка әмәлдари, русийә билән хитайниң ядро қораллар саһәсидә һәмкарлашқанлиқиға аит һәрқандақ бир истихбарат һәққидә сөз қилмиған болсиму, “лекин улар оттурисида мәлум шәкилдики өз-ара маслишишниң болушидин…. . Әндишидә қилидиғанлиқи” ни ейтқан. Бу әмәлдарниң көрситишичә, “бу, американи икки сәптә уруш қилиш вәзийитигә чүшүрүп қойидикән”.

Америка дөләт мәҗлисиниң бу доклати өткән һәптә русийә дөләт думасиниң пат йеқинда “ядро қораллар синиқини омумйүзлүк чәкләш шәртнамиси” дин чекинишни музакирә қилидиғанлиқини җакарлишиниң арқисидин елан қилинған.

Һәрбий көзәткүчиләр әгәр русийә бу шәртнамидин чекинип чиқса, бу русийә, хитай вә американиң ядро синиқини әслигә кәлтүрүшини кәлтүрүп чиқиришидин әндишә қилмақта. Чәтәл таратқулириниң йеқинқи хәвәрлиридә, йеқиндин бери хитайниң лопнур ядро синақ мәйданидики һәрикәтлириниң көпәйгәнлики, бу, хитайниң ядро синиқиға тәйярлиқ қиливатқанлиқ еһтималлиқини күчәйтидиғанлиқи илгири сүрүлгән. Доклатта ейтилишичә, русийә билән хитайниң ядро қораллар тәһдити 2027-йил билән 2035-йили арисида техиму еғирлишидикән. Шуңа, америка һазирдин башлап буниңға “тәйярлиқ көрүши керәк” икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.