"20 Dölet bashliqliri" Uyghur diyarigha chétishliq importni chekleshke chaqirildi
Öktebir éyining axirida rim shehiride échilmaqchi bolghan "20 Dölet bashliqliri yighini" harpisida gheyriy hökümet teshkilatlirining birleshmisi bolghan "Uyghur mejburiy emgikige xatime bérish birleshmisi" 19-öktebir küni mexsus bayanat élan qildi. Bayanatta ular dunya rehberlirini Uyghur diyaridiki mejburiy emgekni cheklesh, shuning bilen birge Uyghur diyarigha baghlinishliq bolghan import pa'aliyetlirini men'i qilishqa dewet qildi.
Mezkur birleshmining tor bétide élan qilin'ghan bayanatta körsitili'ishche, bu qétimqi "20 Dölet bashliqliri yighini" iqtisadiy weyranchiliqni eslige keltürüsh, shu arqiliq insaniyet we yer sharining téximu güzel kelgüsi heqqide muhakime qilishni bash téma qilghaniken. Bayanatta mushu nuqta alahide tekitlinip Uyghur diyaridiki mejburiy emgekning nöwette gherb dunyasi import qiliwatqan quyash énérgiye taxtisi, paxta mehsulatliri qatarliqlargha biwasite baghlinishliq ikenliki, buning höjjetleshken delil-ispatlirining alliqachan yéterlik hazirlan'ghanliqi, bundaq ehwalda dunyawi pakiz énérgiyening wujudqa kélishige "Dagh" chüshürüwatqan import sodisini chekleshning muhimliqi alahide tilgha élindi. "Kishilik hoquqni közitish teshkilati" xitay bölümining diréktori sofi richardson xanim bu heqte söz qilip "Ötkende 'yette dölet guruhi' mejburiy emgekke baghlinishliq teminlesh zenjirini men'i qilish heqqide küchlük qarar aldi. Emma xitay hökümiti kishilik hoquqni heqiqiy yosunda emelge ashurghan'gha qeder hökümetler bu xil mehsulatlarni men'i qilish heqqide emeli heriket qollinishi lazim" dégen.
Ular yawropa ittipaqining mejburiy emgek mehsulatlirini import qilishni cheklesh qararini alqishlash bilen birge buning Uyghur diyaridiki mejburiy emgek mehsulatlirighimu tetbiqlinishi lazimliqini, bu xil mehsulatlarning yawropa bazirida sétilmasliqi üchün téximu küchlük we emili bolghan tedbirlerni élishning zörürlükini körsetken.
Melum bolushiche, "Uyghur mejburiy emgikige xatime bérish birleshmisi" puqrawiy teshkilatlarning birleshmisi bolup dunya Uyghur qurultiyi, Uyghur kishilik hoquq qurulushi, "Emgekchiler heqliri jem'iyiti", "Kishilik hoquqni közitish teshkilati" qatarliq nechche onlighan teshkilatlarni öz ichige alidiken.
- "Shinjangdiki lagérlarni izdesh" namliq sin körünüshidiki lagérlar küchlük ghulghula qozghidi
- Hindistandin kelgen wekil: "Bizning meqsitimiz Uyghur tilini öginip, kimlikimizni qoghdap qélish"
- Abu-zebide ötküzülgen dunya musabiqiside üch neper Uyghur mahir chémpiyon boldi
- Merhum sen'etkar mehmut sulayman: "Anglighin dostum bizdin riwayet"
- Dunya Uyghur qurultiyining saylimi we Uyghur dawasi (nezer 56-san)
