Америка дөләт мәҗлиси хитайниң иқтисадий тәһдитлири һәққидә гуваһлиқ йиғини чақирди

Америка дөләт мәҗлиси қармиқидики “америка-хитай истратегийәлик риқабәт пәвқуладдә комитети” 17-май күни мәхсус гуваһлиқ йиғини чақирип, америка һазир иқтисадий җәһәттә дуч келиватқан иқтисадий тәһдит мәсилисини мәхсус муһакимә қилди. Йиғинда хитайниң америка үчүн мәңгүлүк тәһдит икәнлики йәнә бир қетим муәййәнләштүрүлди.

Америка һөкүмитиниң сабиқ сода вәкили роберт лайтхизир (Robert Lighthizer) хитайниң һазир иқтисадий саһәдә пәйда қиливатқан тәһдитлириниң ялғуз америка һөкүмити үчүнла әмәс, бәлки йәнә америка хәлқи үчүнму зор балайиапәтниң бешарити болуватқанлиқини тәкитлиди. У бу һәқтә қилған гуваһлиқ сөзидә, “һазир америка қилалайдиған бир чоң иш бу тәһдитни вақтида чәкләш һәмдә шу арқилиқ америка тәвәсидики ишләпчиқириш паалийәтлиригә шараит һазирлаш” дәп көрсәтти. Авам палата әзаси роб витман (Rob Wittman) буниң һазир йиллап ойлишидиған мәсилә әмәс, бәлки җиддий түрдә бирнәччә ай ичидә қарар алмиса болмайдиған дәриҗидики мәсилә болуватқанлиқини тәкитлиди.

Йиғинда гуваһлиқ бәргүчиләр охшимиған саһәдики кишиләр болуп, улар бирдәк хитайниң һазир әқлий мүлүк оғрилиқи, иқтисадни васитә қилған һалда тәбиий байлиқ, енергийә вә сода паалийити қатарлиқ түрлүк саһәләргә сиңип кириши, шуниңдәк бу җайларда өз тәсирини кеңәйтиш арқилиқ хитайчә алаһидиликкә игә диктатора шәклини демократийә вә қанун арқилиқ идарә қилишниң орниға дәсситишкә урунуши қатарлиқ мәсилиләрни оттуриға қойди. “гогел” (Google) ширкитиниң сабиқ иҗраийә әмәлдари ерик шимит (Eric Schmidt) бу һәқтә образлиқ қилип: “һазир америка билән хитай оттурисидики риқабәт бизниң дәвримизниң қандақ бир дәвр болидиғанлиқини бәлгиләйду. Шуниң билән биргә кейинки һаятимизниң қандақ һаят болидиғанлиқини бекитиду. Шуңа биз буниңға тездин тутуш қилишимиз лазим. Мән бу елишишта америка йеңип чиқсикән, дегәнни үмид қилимән” деди.