Америка дөләт мәҗлиси уйғур районидики "йиғивелиш лагерлири" һәққидә гуваһлиқ бериш йиғини чақириду

Мухбиримиз әркин
2018-07-20
Share

Америка дөләт мәҗлисиниң бир комитети 26‏-июл күни гуваһлиқ бериш йиғини чақирип, хитайниң уйғур районидики "йиғивелиш лагерлири", тәқибләш вә бастуруш қилмишлири һәққидә мутәхәссисләр вә журналистлардин гуваһлиқ алиду.

Америка авам палатаси хитай ишлар комитетиниң җүмә күни елан қилишичә, "шинҗаңдики кишилик һоқуқ кризиси: тәқибләш, бастуруш вә кәң көләмлик тутқун қилиш" намлиқ мәзкур гуваһлиқ бериш йиғини уйғурларниң күнсери еғирлишиватқан вә начарлишиватқан кишилик һоқуқ вәзийити, хитай һөкүмитиниң уйғур аптоном районида дунядики әң қаттиқ сақчи дөлитини қуруши вә америка -хитай мунасивәтлиридә бу мәсилини қандақ һәл қилишқа даир сиясәтләрни оттуриға қоюшни мәқсәт қилғаникән.

Мәзкур комитет баянатида, "уйғурлар вә шинҗаң уйғур аптоном районидики башқа мусулман милләтләр қанунсиз тутқун қилиниш, тән җазаси, диний әркинлик вә мәдәнийити қорқунчлуқ чәклимигә вә дигитал тәқибләшкә учрап, йүз тонуш аппарати орнитиш, қол телефон тәкшүрүш, DNA әвришкилирини йиғиш қатарлиқ сақчиларниң кәң көләмлик назарити арқилиқ уларниң күндилик һаятиниң барлиқ саһәси назарәт астиға елинди" дейилгән.

Баянатта йәнә, бир милйондәк кишиниң тутқун қилинип, аталмиш "қайта-тәрбийәләш лагерлири" ға соланғанлиқиға даир ишәнчлик мәлуматларниң барлиқи, бу лагерларға соланғанларниң ичидә әркин асия радийоси уйғур бөлүминиң мухбирлири вә тонулған уйғур кишилик һоқуқ паалийәтчиси рабийә қадирниң аилә әзалириниңму барлиқи билдүрүлгән.

Америка авам палатаси хитай ишлар комитетиниң баянатида көрситилишичә, гуваһлиқ бериш йиғинида әркин асия радийосиниң гүлчеһрә хоҗа, америка лойола университетиниң дотсенти раян тум, "хитай архипи" намлиқ тор бетиниң алий муһәррири, америка дөләт ишлар министирлиқиниң сабиқ анализчиси җесика батке гуваһлиқ беридикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт