Америка дөләт мәҗлисиниң әзалири җов байденни уйғур мәсилисни хитай билән болидиған келимат сөһбитигә қурбан қиливәтмәсликкә чақирди

Мухбиримиз ирадә
2021-09-30
Share

Америка дөләт мәҗлиси әзалиридин марко рубийо вә киристофер симис америка президенти җов байденни уйғур мәсилисини хитай билән болидиған келимат сөһбитигә қурбан қиливәтмәсликкә чақирди.

"филорида күндилики" гезитиниң 30-сентәбирдики хәвиригә қариғанда, бу һәптә кеңәш палата әзаси марко рубийо вә авам палата әзаси киристофер симис президент җов байдннға хәт әвәтип, байдин һөкүмити әзалириниң уйғур мәҗбурий әмгикиниң алдини елиш қануниға қарши лобичилиқ қиливатқанлиқи һәққидә чиққан хәвәрләрниң расит-ялғанлиқини сүрүштүргән.

Йеқинда бирләшмә агентлиқ қатарлиқ бир қисим мәтбуатларда америка һөкүмитиниң келимат мәсилисигә тәйинлигән алаһидә әлчиси җон кәррийниң уйғур мәҗбурий әмгикигә қарши туруш қанун лайиһәсигә қарши лобичилиқ қиливатқанлиқи һәққидә хәвәрләр чиққан. Униң үстигә җон кәррий бир қетимлиқ ахбарат зияритидә "байден һөкүмитиниң кишилик һоқуқ мәсилисини қайрип қоюп, келимат өзгиришини таллиғанлиқи" һәққидә соралған суалға "һаят даим қийин таллашларға толған болиду, болупму дөләтләр оттурисидики мунасивәттә даим мушундақ таллашлар болиду," дегән. У йәнә хитайда уйғурларниң мәҗбурий әмгәккә селиниши һәққидә соал соралғандиму "шундақ, бу йәрдә бир қатар охшимиған мәсилиләр мәвҗут. Әмма һәммидин муһими, бу пиланет чоқум қоғдилиши керәк," дегән җавабни бәргән иди.

Дөләт мәҗлиси әзалири марко рубийо вә киристофер симис әпәндиләр президет җов байденға язған хетидә, җон кәррийниң юқириқи сөзлиридин қаттиқ әндишиләнгәнликини ипадә қилған вә униң бир юқири дәриҗилик һөкүмәт әмәлдари болуш сүпити билән бундақ баянларни бәрмәслики керәкликини билдүргән. Улар мәктубида: "җон кәрри әпәндиниң кәлгүси бир нәччә һәптә ичидә хитайда йәнә бир қетим зиярәт қилидиғанлиқини нәзәрдә тутқанда, униң позитсийәси бизниң күчлүк диққитимизни қозғимақта," дегән.

Улар йәнә мундақ дегән: "хитай компартийәси шинҗаңда кәң көләмлик лагерларни йолға қоймақта. Биз кәрри әпәндиниң ирқий қирғинчилиқ мәсилисигә сәл қаришидин әнсирәймиз. У һөкүмитиңизниң келимат нишаниға йетиш үчүн хитайдики мәҗбурий әмгәк күчи арқилиқ ишләпчиқирилған қуяш енергийә тахтилирини америкаға импорт қилмақчи. Бу кәрри әпәндиниң башқиларни бу әхлақсиз вә зөрүр болмиған содиға әкириш үчүн қәстәнгә уни ‹қейин таллаш' дәп вәқәни кичиклитиватқанлиқиниң сәвәби болуши мумкин"

Марку рубийо вә киристофер симис мәктубида президент җов байденға мундақ дегән: "бейҗиңниң келимат өзгиришини һәл қилимән дегән ишәнчсиз вәдиси бәдилигә униң ирқий қирғинчилиқ вә инсанийәткә қарши җинайәтлирини сүрүштүрүш қурбан қилинмаслиқи керәк. Биз сизни кишилик һоқуқни ташқий сияситиңизниң мәркизи қилиштәк вәдиңизгә әмәл қилишқа чақиримиз."

Юқириқи дөләт мәҗлиси әзалири йәнә президент җов байденға язған хетидә һөкүмәтниң уйғур ирқий қирғинчилиқини тохтитиш үчүн қандақ конкирет қәдәмләрни ташлаватқанлиқини, җон кәррийниң хитайға қилидиған зиярәтлиридә кшилик һоқуқ мәсилисни тәкитләйдиған-тәкитлимәйдиғанлиқидәк соалларни сориған.

Улар мәктубини "җумһурийәтчиләр партийәси билән демократчилар партийәси дөләт мәҗлисидә хитай компартийәсиниң шинҗаң уйғур аптоном районида елип бериливатқан ирқий қирғинчилиқ қатарлиқ җинайи қилмишлириға қарши туруш үчүн иттипақлашқан иди. Биз һөкүмитиңизни буни алдинқи орунға қоюшқа чақиримиз. Бизниң буниңға муамилә қилғанлиқимиз тарих тәрипидин баһалиниду вә биз сизни биз билән бирликтә зулумға учриғучилар билән бир сәптә турушқа дәвәт қилимиз," дегән җүмлиләр билән аяқлаштурған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт