Пентагон тунҗи “дөләт мудапиә санаити истратегийәси” ни елан қилған

Вашингтондин мухбиримиз ирадә тәйярлиди
2024.01.12

Пентагон( бәш бурҗәклик бина), йәни америка мудапиә министирлиқи тунҗи “дөләт мудапиә санаити истратегийәси” ни елан қилип, американиң мудапиә санаити русийә вә хитайға охшаш риқабәтчиләргә тақабил туруш үчүн зор өзгиришкә моһтаҗ” дәп тәкитлигән.

Мудапиә хәвәрлири ториниң билдүрүшичә, “һәрикәткә чақириш” дәп аталған бу истратегийәдә американиң һазирқи вәзийәткә көрә мудапиә сепи қуруши үчүн тәвсийәләр сунулған болуп, униңда “америка һелиһәм дунядики әң илғар қоралларни ишләпчириқириватқан дөләт болсиму, бирақ у һазирқи риқабәткә толған дуняға нисбәтән йетәрлик әмәс. Әвзәлликимизни әң зор дәриҗидә ашуруш үчүн чоқум уларни сүрәт билән вә кәң көләмдә ишләпчиқириш иқтидариға игә болушимиз керәк” дейилгән.

Һөҗҗәттә йәнә американиң асаслиқ риқабәтчиси болған хитайниң “йеқинқи 30 йилда, парахот ясаштин һалқилиқ минерал маддилар вә микро електрон мәһсулатлириғичә болған нурғун муһим саһәдә йәршари санаәт күчлүк дөлитигә айланғанлиқи” әскәртилгән вә америка мудапиә министирлиқиға һәрбий мудапиә санаитини күчәйтиш, бу саһәдики тәминләш зәнҗирлирини көп хиллаштуруш, техиму көп кәсип әһлилирини тәрбийәләш вә америкиниң шерик дөләтлири билән техника һәмкарлиқини ашуруш қатарлиқ тәклипләр сунулған.

Юқиридики бу доклатниң елан қилиниши дәл бу һәптиниң бешида америка вә хитайниң һәрбий әмәлдарлири икки йил аридин кейин тунҗи қетим йүз туранә көрүшкәндин кейингә тоғра кәлгән.

8-Вә 9-январ күнлири өткүзүлгән бу учришишта, америка дөләт мудапиә министирлиқиниң муавин ярдәмчи министири майкел чәйс билән хитай мәркизи һәрбий ишлар комитети хәлқара һәрбий һәмкарлиқ бөлүми муавин мудири генерал майор суң йәнчав билән көрүшкәниди.

Америка мудапиә министирлиқи йиғин һәққидики баянатида, икки дөләт һәрбий рәһбәрлириниң “район вә йәршари характерлик бихәтәрлик мәсилилирини музакирә қилғанлиқини, икки дөләт арисидики риқабәтниң тоқунушқа айлинип кетишиниң алдини елиш үчүн, икки дөләт армийәсиниң алақисиниң очуқ линийәсини сақлашниң муһимлиқини” тәкитлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.