“Dölet ortaq tili dersxanisi” xitay sheherliridiki Uyghurlarghimu kéngeytilgen

Muxbirimiz jüme
2018-02-10
Share

Xitay da'irilirining atalmish “Milletler ittipaqliqi a'ilisi” we xitay tilini omumlashturushni meqset qilghan “Dölet ortaq tili dersxanisi” herikitini xitay sheherliride soda qiliwatqan Uyghurlargha qeder kéngeytkenliki melum.

“Xitay xewerler tori” ning körsitishiche, 6-féwral gu'angju shehiri da'iriliri mezkur sheherde soda qiliwatqan bir Uyghur réstoranigha atalmish “Dölet ortaq tili dersxanisi” lewhesini teqdim qilghan. 

Xewerge bérilgen murasim heqqidiki foto süretlerge qarighanda, mezkur pa'aliyetningmu Uyghur élide kéngeytilgen atalmish “Milletler ittipaqliqi a'ilisi” bayriqi astida yolgha qoyulghanliqi melum. 

Lewheni gu'angju sheherlik partkom we gu'angdung ölkisi shinjangliq sodigerlerni bashqurush orni birliship tarqatqan. 

Bu réstorandiki Uyghur xizmetchilerge xitay tili dersi ötüshni mezkur sheherdiki yingtey bashlan'ghuch mektipi üstige alghan bolup, mektep teyinligen oqutquchilar her heptide bir qétim réstoran'gha kélip ders ötidiken.

Xitay da'iriliri atalmish “Milletler ittipaqliqi a'ilisi” siyasitini Uyghur élining her qaysi jaylirida kéngeytken we her derijilik hökümet kadirlirini Uyghurlar bilen “Tughqan” bolushqa seperwerlik qilghan. 

Ötken yilining axiri zor bir türküm hökümet xadimliri Uyghurlarning öyide bir hepte yétip-qopushqa orunlashturulghan.

Kéyin bu kadirlarning özi orunlashqan a'ililerning ehwalini igileydighanliqi, ularning barliq ish-heriketlirini xatirilep yuqirigha melum qilidighanliqi ashkarilan'ghan idi.

Bu xildiki “Milletler ittipaqliqi a'ilisi” we “Dölet ortaq tili dersxanisi” ning xitayning bashqa jaylirida soda qiliwatqan Uyghurlarghimu kéngeytilgen, kéngeytilmigenliki, Uyghur réstoranigha teyinlen'gen xitay oqutquchining ders ötüshtin bashqa yene qandaq yoshurun wezipilerni üstige alghanliqi hazirche namelum.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet