Dunya kilimat yighini béyjing we yéngi déhlining tütekte qalghanliqi bilen bashlandi

Muxbirimiz eziz
2015.11.30


30 - Noyabir küni fransiyening paytexti parizhda bashlan'ghan dunya kilimat yighinigha 150 ke yéqin döletning rehberliri qatnashti. Yighinda yer shari kilimatidiki özgirishler heqqide ortaq xelq'ara kélishim hasil qilish hemde atmosfradiki parnik gazini azaytish arqiliq yer sharining issip kétishini séslsiye ikki gradus ichide cheklesh qatarliq chong mesililer muzakire qilinmaqchi.

Roytérsning xewer qilishiche, dunya kilimat yighini bashlan'ghan düshenbe küni béyjing we yéngi déhlining ha'awasi tütekte qalghan. Xitayning muhit asrash ministirliki béyjingning is - tütek bilen qaplinish ehwalini qishliq issinish peslining bashlinishi we nachar hawa rayi sewebidin kélip chiqqan dep izahlighan. 22 Milyondin artuq nopusqa ége béyjing shehirining bir qisim jaylirida hawaning sapliq körsetküchi 500 nuqtigha yetken bolup, normalda 300 nuqtidin éship ketse alaqidar belgilimiler boyiche ahaliler öydin chiqmasliqqa dewet qilinidiken.

16 Milyon nopusqa ége yéngi déhlidiki hawaning sapliq körsetküchi 372 nuqtigha yetken bolup, sheher hawasining bulghinish derijisi “Xeterlik” derijisining ölchimige yetkenliki tekitlen'gen.

Mutexessislerning qarishiche, kömürning yéqilghu süpitide qollinilishi sheher hawasining bulghinishidiki asasliq seweb iken. Emma, xitaydiki muhit tarmaqlirining éytishiche, hazirqi ehwalda hawaning sapliq derijisining normal ölchemge yétishi az dégendimu 2030 - yilighiche mumkin bolmaydiken.

Éghir is - tütek tüpeylidin ürümchi ayrodromidimu 27 - nopabirdin bashlap bir qisim ayropilanlarning uchush we qonush waqti keynige sürülgenliki, shundaqla bir qisim ayropilanlarning uchushi emeldin qaldurulghanliqi, mushu sewebtin yette mingdin artuq yoluchining mangalmaywatqanliqi melum bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.