Dunya Uyghur qurultiyi: "Xelq'ara jem'iyetning xitayning Uyghurlargha qaratqan tizginsiz basturushigha qarshi heriket qilish waqti keldi"

Muxbirimiz erkin
2019-09-30
Élxet
Pikir
Share
Print

Dunya Uyghur qurultiyi xitay xelq jumhuriyiti qurulghanliqining 70 yilliqi harpisida bayanat élan qilip, xelq'ara jem'iyetning xitayning Uyghurlarni tizginsiz basturushi we omumyüzlük teqib qilishigha qarshi heriket qilish waqti kelgenlikini bildürgen.

Bayanatta xitayning Uyghurlargha misli körülüp baqmighan siyasetlerni yürgüzüwatqan bir waqitta özining 70 yilliqini daghdughiliq tebriklewatqanliqi, xelq'ara jem'iyetning söz bilen réyalliqni ayriwélishi kérekliki tekitlen'gen. Bayanatta 3 milyondek kishining lagérlargha qamalghanliqi, nazaret apparatlirining pütün Uyghurlarni teqib astigha alghanliqi, "Uyghur kimlikini yoqitish herikitining özila béyjingning sözlirini külkilik nersige aylandurup qoyghanliqi" ni bildürgen.

Mezkur bayanat xitay hökümiti 1‏-öktebir küni daghdughiliq parat ötküzüp, dunyagha özining küchini körsitishke shundaqla özining Uyghur rayonidiki "Radikalliqqa qarshi turush tedbirlirining ghelibisi" ni alahide gewdilendürüp, bashqa döletlerni özidin ülge élishqa ündewatqan mezgilde élan qilindi.

Bayanatta dunya Uyghur qurultiyining re'isi dolqun eysaning sözi neqil keltürülüp, "Xitayning dölet ichidiki basturush siyasiti éniq ashkarilan'ghan bir waqitta uning bu siyasitining dunyadiki bashqa jaylargha tarqilishini tosush xelq'ara jem'iyetning kelgüsi yillardiki wezipisidur," déyilgen. Bayanatta tekitlishiche, xitay tereqqiyatni özining tüp kishilik hoquqqa hörmet qilmasliqining bahanisi qiliwalghan bolsimu, lékin uning bedilini yenila Uyghurlar ötimekte iken.

Bayanatta mundaq déyilgen: "Uyghur rayoni yéqinqi yillarda ghayet zor tereqqiyatqa érishken bolsimu, lékin bu adil bolmidi. Iqtisadi kemsitish (Uyghurlar) ning emgek bazirigha kirishige dawamliq tosqunluq qilip, Uyghurlarning yuqiri kirimdiki xizmetlerge kirishi cheklinip keldi." bayanatta qeyt qilinishiche, xitayning qilmishini jawabkarliqqa tartishta yawropa ittipaqi we xelq'ara jem'iyetning küchlük we prinsipal inkas qayturushi telep qilin'ghan. Shu küni yene amérikadiki "Uyghur kishilik hoquq qurulushi" bayanat élan qilip, tibet, mongghul, teywen, xitay xelqi we xongkongluqlarning xitaygha qarshi herikitini qollaydighanliqini bildürgen.

Toluq bet