D u q: "Xelq'arani Uyghur musapirliri we siyasiy panahliq tiligüchilirining teqdirige diqqet qilishqa chaqirimiz"

Muxbirimiz erkin
2020-06-22
Élxet
Pikir
Share
Print

Dunya Uyghur qurultiyi 20-iyun dunya musapirlar küni munasiwiti bilen bayanat élan qilip, xelq'ara jem'iyetni dunyaning her qaysi jayliridiki Uyghur musapirliri we siyasiy panahliq tiligüchilirining teqdirige diqqet qilishqa we ularni qoghdashqa chaqirghan.

Bayanatta tekitlishiche, "Uyghur musapirliri xitayning insaniyetke qarshi jinayiti we dehshetlik jazalashliridin qéchip qutulghan bolsimu, lékin bu ularning azap-oqubetlirige xatime bérelmigen. Ular yenila bixeter emes bolup, nurghun bésim we yochuqlargha duch kelmekte shundaqla xitayning uzun qoli ulargha sozulup, ularning azab-oqubetlirini dawamlashturmaqta" iken.

Bayanatta xitay hökümitining Uyghur musapirlirining izini qoghlap, sahipxan döletlerge Uyghur musapirliri we siyasiy panahliq tiligüchilirini qayturup bérish heqqide bésim ishlitip kelgenliki, qayturup bérilgenlerning "Iz-déreksiz ghayib bolush, tutqun qilinish, ten jazasi we bashqa gheyriy insaniy mu'amililerge duchar bolup kelgenliki" tekitlen'gen. Dunya Uyghur qurultiyining ilgiri sürüshiche, yéqinqi 20 yil ichide 16 dölettin 300 din artuq Uyghurning xitaygha mejburiy qayturup bérilgenliki delillen'gen.

Bayanatta xitayning Uyghur musapirlirigha pasport yéngilap bérishni ret qilishi nurghun Uyghur musapirlirida dölet tewelikisiz qélish xewpini peyda qilghanliqi, korona wirusi yuqumi ularning ehwalini téximu éghirlashturghanliqi, türkiyediki a'ilisidin ayrilghan oqughuchilar, balilar we tul anilarning ehwali téximu qiyinlashqanliqi tekitlen'gen. Bayanatta telep qilishiche, her qaysi döletler "Uyghur musapirliri we siyasiy panahlan'ghuchilirini qayturup bérishni toxtitishi, ularni qoghdishi, xitay hökümitidin ularning a'ilisi bilen bolghan alaqisini eslige keltürüshni telep qilishi, b d t musapirlar mehkimisi ulargha qarita heqiqiy menidiki ünümlük tedbirlerni élishi kérek" iken.

Toluq bet