Гучуң наһийәсидә едиқут уйғур ханлиқи дәвригә аит зор көләмлик аммиви мунчиниң харабиси байқалған

Мухбиримиз ирадә
2020-11-19
Share

Уйғур елиниң гучуң наһийәси тәвәсидә едиқут уйғур ханлиқи дәвригә аит зор көләмлик аммиви мунчаханиниң харабиси тепилған. Хитайниң шинхуа тори 18-ноябир тарқатқан хәвәрдин қариғанда, үч йил бойичә елип берилған археологийилик қезиш нәтиҗисидә археологлар гучуң наһийиси тәвәсидин едиқут уйғур ханлиқи мәзгилидә, йәни миладийә 10-әсир дә селинған зор көләмлик аммиви мунчаханиниң харабисини байқиған.

Хәвәрдә ейтилишичә, йеңидин байқалған қәдимий мунчаханиниң харабиси тәңритеғиниң шималиға җайлашқан гучуң наһийисиниң шәрқий-шималиға җайлашқан икән. Омумий қурулмиси мәркизий бөлүм вә шәрққә тутишидиған кариватлиқ бөлүм, шималий мәркизигә җайлашқан очақ орни вә сол вә оң тәрәпләргә җайлашқан қудуқ қатарлиқ бөлүмләрдин тәркиб тапидикән. ююнуш орниниң омумий көлими тәхминән 400 квадрат метир болуп, уни каридор райони, хизмәт райони вә ююнуш районидин ибарәт үч районға бөлүшкә болидикән.

Археологларниң баһалишичә, бу икки қәвәтлик мунчахана қурулуши төвәнки қәвәттики икки йепиқ бошлуққа бөлүнгән болуп, тирәк сүпитидә хиш таянч түврүкләр ишлитилгән икән, бу қәдимки рим дәвридики “бинакарлиқ он китаби” да “қуруқ йәр” дәп атилидикән.

Хәвәрдә ейтилишичә, археологлар бу харабилиқниң едиқут уйғур дәвридә шәһәр аһалиси үчүн ясалған аммиви мунчахана икәнликини, униң моңғул импирийәси дәвригә қәдәр ремонт қилинип ишлитилгәнликини билдүргән. ююнуш орнида қезивелинған сапал қача, қазан, часа хиш вә башқа буюмларму шу дәврләргә тәвә икән.

Чәтәлләрдики уйғур мәдәнийәт тарихини тәтқиқ қилидиған мутәхәссисләр идиқут уйғур ханлиқи дәвридә ясалған бу аммиви мунчаханини оттура әсир уйғур шәһәр мәдәнийитиниң парлақ бир бәлгиси, уйғур мәдәнийәт тарихидики муһим бир намайәндә, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт