Guchung nahiyeside édiqut Uyghur xanliqi dewrige a'it zor kölemlik ammiwi munchining xarabisi bayqalghan

Muxbirimiz irade
2020-11-19
Share

Uyghur élining guchung nahiyesi teweside édiqut Uyghur xanliqi dewrige a'it zor kölemlik ammiwi munchaxanining xarabisi tépilghan. Xitayning shinxu'a tori 18-noyabir tarqatqan xewerdin qarighanda, üch yil boyiche élip bérilghan arxé'ologiyilik qézish netijiside arxé'ologlar guchung nahiyisi tewesidin édiqut Uyghur xanliqi mezgilide, yeni miladiye 10-esir de sélin'ghan zor kölemlik ammiwi munchaxanining xarabisini bayqighan.

Xewerde éytilishiche, yéngidin bayqalghan qedimiy munchaxanining xarabisi tengritéghining shimaligha jaylashqan guchung nahiyisining sherqiy-shimaligha jaylashqan iken. Omumiy qurulmisi merkiziy bölüm we sherqqe tutishidighan kariwatliq bölüm, shimaliy merkizige jaylashqan ochaq orni we sol we ong tereplerge jaylashqan quduq qatarliq bölümlerdin terkib tapidiken. Yuyunush ornining omumiy kölimi texminen 400 kwadrat métir bolup, uni karidor rayoni, xizmet rayoni we yuyunush rayonidin ibaret üch rayon'gha bölüshke bolidiken.

Arxé'ologlarning bahalishiche, bu ikki qewetlik munchaxana qurulushi töwenki qewettiki ikki yépiq boshluqqa bölün'gen bolup, tirek süpitide xish tayanch tüwrükler ishlitilgen iken, bu qedimki rim dewridiki "Binakarliq on kitabi" da "Quruq yer" dep atilidiken.

Xewerde éytilishiche, arxé'ologlar bu xarabiliqning édiqut Uyghur dewride sheher ahalisi üchün yasalghan ammiwi munchaxana ikenlikini, uning mongghul impiriyesi dewrige qeder rémont qilinip ishlitilgenlikini bildürgen. Yuyunush ornida qéziwélin'ghan sapal qacha, qazan, chasa xish we bashqa buyumlarmu shu dewrlerge tewe iken.

Chet'ellerdiki Uyghur medeniyet tarixini tetqiq qilidighan mutexessisler idiqut Uyghur xanliqi dewride yasalghan bu ammiwi munchaxanini ottura esir Uyghur sheher medeniyitining parlaq bir belgisi, Uyghur medeniyet tarixidiki muhim bir namayende, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet