Явропаниң техиму әҗәллик васитә арқилиқ хитайни чәклиши тәклип қилинмақта

Мухбиримиз әзиз
2021-03-30
Share

Уйғур җәмийити дуч келиватқан зор қирғинчилиқ һадисисини пилта қилған һалда хитай билән ғәрб дунясида бир зор қариму-қаршилиқ барғансери мунтизим шәкил еливатқанда бир қисим анализчилар явропа иттипақини техиму әҗәллик болған "универсал мәбләғ селиш келишими" арқилиқ хитайни чәкләшкә дәвәт қилишқа башлиди.

"блумберг тори" ниң 30-марттики хәвиридә ейтилишичә, нөвәттә америка вә явропа иттипақи хитайни һәқләр дәпсәндичилики бойичә тәнқидлисә, хитай һөкүмити "сән бизниң ички ишлиримизға арилашма" дәп муттәһәмлик қилмақта икән. Йәнә келип, ғәрб дуняси зулумни иҗра қилғучи бир қисим хитай әмәлдарлириға ембарго қойса, хитай һөкүмити бу зулумлар һәққидә сөз қилған америка вә әнглийәдики шәхсләргә, һәтта алимларға "җаза бериш" кә алдиримақта икән. Анализчи андрес клус мушу әһвални көздә тутуп "әмди ‹универсал мәбләғ селиш келишими'ни иҗра қилиш арқилиқ хитайни пәскойға чүшүридиған пәйт йетип кәлди" дәйду.

Мәлум болушичә, мәзкур келишимниң мәзмуни явропаниң хитайға мәбләғ селиши һәмдә буниңға мунасивәтлик базар вә башқа иқтисадий һәмкарлиққа биваситә четилидикән. Шундақ болғанлиқи үчүн әгәр явропа иттипақи халиса бу келишим арқилиқ хитай иқтисадиға биваситә тәсир көрситәләйдикән. Аптор германийә һөкүмитиниң изчил хитайға қаттиқ мәвқәдә болалмайватқанлиқини тәнқидләп "һазир бизниң дуч кәлгинимиз қандақтур бирәр тәрәпкә ян бесиш әмәс. Әксичә бу ашкарилиқ вә қанун арқилиқ идарә қилишқа хирис қиливатқан мустәбитликкә қарши туруш мәсилисидур. явропаниң әмди давамлиқ оттура йол тутушиға имканийәт қалмиди" дәйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт