Wodrow wilson merkizining sowét arxipliri ambirida elixan törining xéti orun aldi

Muxbirimiz ümidwar
2016-11-06
Élxet
Pikir
Share
Print

Amérikidiki wodrow wilson merkizining soghuq munasiwetler urushi tetqiqat programmisi boyiche teyyarlan'ghan bir qisim sabiq sowét ittipaqi mexpiy arxip höjjetliri ambirigha 1934-yilidin 1949-yillarghiche bolghan ariliqtiki Uyghur diyarigha a'it sowét arxip höjjetlirimu kirgüzülgen bolup, bularning ichide melum salmaqtiki höjjetler 1944-1949-yillardiki milliy azadliq inqilab dewrige munasiwetliktur. Ene shu höjjetler qatarida sherqiy türkistan jumhuriyiti hökümitining re'isi elixan törining 1945-yili, 22-april küni sowét ittipaqi rehbiri stalin'gha yazghan mexsus xétimu orun alghan.

Sowét arxip höjjitidin ashkarilinishiche, mezkur xet elixan töre teripidin türkiy tilida yézilghan bolup, aldi bilen ghuljidiki 2-dom wekilliri arqiliq terjime qilin'ghandin kéyin sowét ittipaqi ichki ishlar xelq komissari lawrénti bériyagha yetküzülgendin, bériya xetni stalin we molotowgha yetküzüp bergen.

Xet axirigha "Elixan töre shakirjan" dégen imza qoyulghan bolup, elixan töre özining bu qisqa xétide stalinning bergen yardemlirige rehmet bildürgen hemde uningdin téximu zor yademlerni kütüsh ümidi izhar qilin'ghan.

Elixan töre stalin'gha xet ewetken waqit ili wilayiti toluq azad bolghan we milli armiye qurulup, pütün shimal, sherq we jenubiy yönilishler boyiche herbiy heriket bashlash ishenchisi kücheygen peyt idi.

Hazirghiche melum bolghan mexpi höjjetlerge köre elixan törining sowét ali rehberlirige yazgha üch parche xéti heqqide uchur bar.

Wodrow wilson merkizining arxip ambirida yene ghuljidiki sowét ittipaqi xadimliri, jümlidin sowét ittipaqi dölet ichki ishlar xelq komissariyatining yuqiri derjilik wekili général mayor wladimir stépanowich yégnarowning bir qisim doklatlirimu orun alghan. Elwette, yene köpligen mexpiy höjjetler téxi bu jaygha toplinish imkaniyitige ige bolmighan.

Toluq bet