Eljezire türkiyege kelgen Uyghurlarning tinchliq we adalet izdigüchiler ikenlikini xewer qildi

Xitayning chet'elge qéchiwatqan Uyghurlar heqqidiki selbiy teshwiqatliri bir qisim meshhur xelq'ara axbarat wasitilirining Uyghur muhajirlargha qarita diqqet-étibarini kücheytti.

Eljezire muxbiri ötken hepte türkiyening qeyseri shehirige bérip, u yerge yéngidin makanlashqan Uyghur muhajirlarni ziyaret qilghan. Eljezirening tünügünki xewiride, Uyghurlarning chet'ellerge tinchliq we adalet izdep seper qiliwatqanliqi asasliq téma qilin'ghan. Xewerde Uyghurlarning éghir diniy bésimgha uchrawatqanliqi, xalighanche tutqun qiliniwatqanliqi mezkur muhajirlarning kechmishliri arqiliq otturigha qoyulghan.

Xewerde melum bir muhajirning dadisining 10 yil türmide yétip chiqqanliqi, özining qisqa waqit ichide ikki qétim qamaqta yatqanliqi, saqchilarning nazariti we awarichilikidin bir künmu xaliy bolalmighanliqi tilgha élin'ghan. Xewerde yene, melum bir muhajirning öz yurtidin malayshiyagha 3 ayda yétip kelgenliki, türkiyege kélish üchün yene bir yildin artuq kütkenliki, bu jeryanda birqanche seperdishining yol üstide hayatidin ayrilghanliqi bayan qilin'ghan.