Xelq'ara taratqular en'gliyening yawropa ittipaqidin bölünüp chiqishi xitayni téximu menpe'etlendüridu, dep qarimaqta

Birleshme agéntliqning xewirige qarighanda, yawropadiki köpligen iqtisadshunaslar bilen siyasiy analizchilar en'gliyening yawropa ittipaqidin bölünüp chiqishining xitaygha téximu köp iqtisadiy we siyasiy menpe'et élip kélidighanliqini mölcherlimektiken.

Gerche xitay bash ministiri li kéchyang en'giliyeni dawamliq halda yawropa ittipaqining qoynida qep qélishqa ündigen shundaqla özining “Birlikke kelgen we muqim bolghan yawropa ittipaqi” ni körüshni ümid qilidighanliqini bildürgen bolsimu, emma analizchilar xitay soquwatqan chotning bashqiche ikenlikini tekitlimekte.

Chingxu'a uniwérsitéti junggo-yawropa munasiwetliri merkizining diréktori jang lixu'a xitay bash ministiri li kéchyangning inkasigha qarshi halda mundaq dégen: “En'gliye yawropa ittipaqidin bölünüp chiqqandin kéyin, junggo terepning érishidighan bir chong paydisi shuki, junggo yawropa ittipaqi bilen bolghan qoyuq soda we iqtisadiy munasiwetlerni dawamlashturupla qalmastin, belki yene büyük biritaniye padishahliqi bilen téximu küchlük we téximu biwasite bolghan iqtisadiy munasiwetni berpa qilidu. Hazirqi ehwaldin élip éytqanda, meyli yawropa ittipaqi bolsun we yaki en'gliye bolsun, junggo bilen bolghan eng yaxshi hemkarliqni saqlashqa éhtiyajliq.”

U yene mundaq dégen: “Yawropa ittipaqining, jümlidin en'gliyening junggo bilen bolghan iqtisadiy alaqilerdiki qoyuq munasiwetliri shek-shübhisizki, ikki terepning siyasiy munasiwetlirini téximu yumshitidu.”

Melum bolushiche, yawropa ittipaqi xitayning eng chong iqtisadiy shériki bolup, iqtisadshunaslarning közitishiche, xitay meblegh salghuchilarning köp qismi yawropani amérikigha qarighanda téximu bixeter bazar hésablaydiken.