En'gliye parlaméntining Uyghurlar qollap kéliwatqan bir palata ezasi xitay elchixanisining tebriklesh pa'aliyitige qatnashqan

En'gliye parlaméntining Uyghurlarni qollap kéliwatqan awam palata ezasi, parlaméntning hakimiyet béshidiki ishchilar partiyesidin bolghan hindi-tinch okyan ishliri ministiri katérin wéstning ötken hepte en'gliyediki xitay elchixanisi ötküzgen xitay xelq jumhuriyitining 75 yilliqini tebriklesh pa'aliyitige qatnishishi tenqidke uchrighan. Melum bolushiche, 25-séntebir küni hökümetke wakaliten tebrikleshke qatnashqan katérin wést, pa'aliyette xitay artis qizlirining en'eniwi Uyghur kiyimlirini kiyip oynighan Uyghur usullirini körüshke mejbur bolghan. Nöwette, katérin wéstning xitay hökümiti Uyghurlargha “Irqiy qirghinchiliq” qilish bilen eyibliniwatqan, hetta katérin wéstni öz ichige alghan en'gliye parlamént ezalirimu, xitayning Uyghurlargha “Irqiy qirghinchiliq” qilghanliqini békitken peytte, xitayning dölet bayrimini tebrikleshke qatniship, xitay qizlirining oynighan Uyghur usulini körüshi, “En'gliye hökümiti we Uyghur ammisigha qilin'ghan ochuq-ashkara haqaret” dep eyiblenmekte.

Buninggha “Xelq'ara parlaméntlar xitay ittipaqi” ning ijra'iye diréktori luk dé pulfort, 30-séntebir X ta inkas bildürüp, “Eger bizning Uyghur irqiy qirghinchiliqigha da'ir endishilirimizni qorqunchluq we irqchil bir köngül échish pa'aliyitige aylandurghan béyjingni, öz'ara menpe'et yetküzüsh diyalogigha könglidin qiziqidu, dep qarisingiz, kallingizni tekshürüsh béqishingiz kérek” dégen. Halbuki, xitayning chet ellerdiki diplomatiye organliri we béyjingperes xitay ammiwi teshkilatlirining chaghan we dölet bayrimigha oxshash tebriklesh pa'aliyetliride, Uyghur medeniyet-sen'itini sehnige élip chiqish arqiliq xitayning Uyghurlargha “Irqiy qirghinchiliq” qilghanliqini inkar qilmaqchi boluwatqanliqi melum. Xewerlerde, katérin wéstning 2021-yili 12-ayda en'gliye tashqi ishlar ministirigha xet yézip, london Uyghur sot kollégiyesining xitayni Uyghurlargha irqiy qirghinchiliq qildi, dep békitkenlikini bildürüp, buninggha qarita hökümetning inkasini we hökümetning london Uyghur sotining qararini qobul qilip, bu qirghinchiliqta jawabkarliqi bolghan xitay emeldarlirigha jaza yürgüzidighan yürgüzmeydighanliqini sorighanliqi qeyt qilinmaqta.